Hirunews Logo
%E0%B6%A2%E0%B7%8F%E0%B6%AD%E0%B7%92%E0%B6%9A+%E0%B6%86%E0%B6%BB%E0%B6%9A%E0%B7%8A%E0%B7%82%E0%B7%8F%E0%B7%80%E0%B6%A7+%E0%B7%84%E0%B7%8F+%E0%B7%83%E0%B6%B8%E0%B6%9C%E0%B7%92%E0%B6%BA%E0%B6%A7+%E0%B6%B6%E0%B7%8F%E0%B6%B0%E0%B7%8F%E0%B7%80%E0%B6%B1+%E0%B6%9A%E0%B6%BB%E0%B7%94%E0%B6%AB%E0%B7%94+%E0%B7%83%E0%B6%B8%E0%B7%8F%E0%B6%A2+%E0%B6%B8%E0%B7%8F%E0%B6%B0%E0%B7%8A%E2%80%8D%E0%B6%BA+%E0%B6%94%E0%B7%83%E0%B7%8A%E0%B7%83%E0%B7%9A+%E0%B6%B4%E0%B7%8A%E2%80%8D%E0%B6%BB%E0%B6%A0%E0%B7%8F%E0%B6%BB%E0%B6%BA+%E0%B7%80%E0%B7%93%E0%B6%B8+%E0%B7%83%E0%B7%93%E0%B6%B8%E0%B7%8F+%E0%B6%9A%E0%B7%92%E0%B6%BB%E0%B7%93%E0%B6%B8%E0%B6%A7+%E0%B6%B4%E0%B7%92%E0%B6%BA%E0%B7%80%E0%B6%BB
Tuesday, 13 March 2018 - 21:57
ජාතික ආරක්ෂාවට හා සමගියට බාධාවන කරුණු සමාජ මාධ්‍ය ඔස්සේ ප්‍රචාරය වීම සීමා කිරීමට පියවර
3,433

Views
ජාතික ආරක්ෂාවට හා සමගියට බාධාවන කරුණු සමාජ මාධ්‍ය ඔස්සේ ප්‍රචාරයවීම සීමා කිරීමට අදාළ සමාගම් සමඟ සාකච්ඡා කරන බව ජනපතිවරයා පවසනවා.

මෛත්‍රීපාල සිරිසේන මෙම අදහස් පළකලේ ජපානයේ ජීවත්වන ශ්‍රී ලාංකිකයින් සමග අද (13) පස්වරුවේ ටෝකියෝ නුවර ඉම්පීරියල් හෝටලයේදී පැවැත්වුණු හමුවකට එක්වෙමින්.

මහනුවර සහ අම්පාරේ ඇති වූ සිදුවීම්වලින් පසුව ෆේස්බුක් සමාජ ජාලය තාවකාලිකව තහනම් කිරීම ඉදිරි දින කිහිපයේදී ඉවත් කරන බවයි ජනාධිපතිවරයා එහිදී කියාසිටියේ.

සමාජ යහපත වෙනුවෙන් වන ප්‍රවාහයකට ඉඩ දුන්න ද සමාජය විනාශ කරන යම් දෙයක් වේ නම් එය පාලනය කිරීමට යම් ක්‍රමවේදයක් අවශ්‍ය බව ජනාධිපතිවරයා පෙන්වා දුන්නා.

මානව සමාජයේ යහපත සදහා නිර්මාණය වූ ජංගම දුරකථන, පරිගණකය, අන්තර් ජාලය, සමාජ මාධ්‍ය තුලින් ලෝකයක දැනුම තමන්ට අත්කර ගත හැකි වුව ද අවාසනාවකට ශ්‍රී ලංකාවේ ඇතැම් පිරිස් මෙම සම්පත් භාවිතා කරනු ලබන්නේ රට විනාශ කිරීමට බවයි ජනාධිපතිවරයා කියාසිටියේ.

එබැවින් මෙම සම්පත් නිසි ලෙස භාවිතා කිරීම පිළිබද නව වැඩපිළිවෙළක් ඉදිරි සති කිහිපය තුළ රටට හදුන්වාදීමට අපේක්ෂා කරන බව ඔහු ප්‍රකාශ කළා.  

ජාතික සමගිය නැති කිරීම, ජාතික ආරක්ෂාවට හානි කිරීම, පුද්ගලයන්ට කරන බරපතළ නින්දා කිරීම් වැනි දේ ඉවත් කර යහපත් සහ නිවැරදි දේ පමණක් හුවමාරු කෙරෙන මාධ්‍ය වැඩි වැඩියෙන් අවශ්‍ය බව ද මෛත්‍රීපාල සිරිසේන මහතා මෙහිදී කියාසිටියා.

මේ අතර ජනතාවට සිදුවන අපහසුතාවන් පිළිබඳව සළකා බලා තාවකාලිකව සීමා කර තිබූ වයිබර් සමාජජාලයට ප්‍රවේශවීම සඳහා අද (13) මධ්‍යම රාත්‍රියේ සිට යළිත් අවස්ථාව ලබාදීමට රජය තීරණය කර තිබෙනවා.

නිවේදනයක් නිකුත් කරමින් රජයේ ප්‍රවෘත්ති දෙපාර්තමේන්තුව සඳහන් කළේ මෙහිදී විශේෂයෙන්ම විදෙස්ගත ශ්‍රමිකයින් හට සිය නිවෙස් සමග සන්නිවේදනය කිරීමේදී මුහුණදීමට සිදුවන අපහසුතාවන් මෙන්ම සංචාරකයින්ට සහ ව්‍යවසායකයින්ට සිදුවී ඇති අපහසුතාවන් පිළිබඳව අවධානය යොමුවූ බවයි.

පසුගිය දිනවල රටේ ඇතැම් ප්‍රදේශවල කළහකාරී සිදුවීම් හටගත් අවස්ථාවේදී වෛරී සහ වර්ගවාදී ප්‍රකාශ පතුරුවා හැරීමට ඇතැම් පාර්ශවයන් නීතිවිරෝධී ලෙස සමාජමාධ්‍ය භාවිත කිරීම පාලනය කිරීම සඳහා රජය පසුගියදා කටයුතු කළා.

ඒ අනුව ජනතාවට සිදුවන අපහසුතාවන් සළකා බලා මූලික පියවරක් ලෙස මෙලෙස වයිබර් සමාජ ජාලයට ප්‍රවේශවීමට පනවා තිබූ සීමා අද මධ්‍යම රාත්‍රියේ සිට ඉවත් කරන බවයි අදාළ නිවේදනයේ වැඩිදුරටත් දැක්වෙන්නේ.

ෆේස්බුක් සමාගමේ නිලධාරීන් කණ්ඩායමක් සමඟ ලබන බ්‍රහස්පතින්දා පැවැත්වෙන සාකච්ඡාවකින් අනතුරුව බොහෝ දුරට සිකුරාදා වනවිට අනෙකුත් සමාජ මාධ්‍ය වෙත පිවිසීමට ඇති බාධාව ඉවත් කෙරෙනු ඇති බව බව විදුලි සංදේශ හා ඩිජිටල් යටිතල පහසුකම් අමාත්‍යාංශය පවසනවා.

මහනුවර ඇති වූ නොසන්සුන්කාරි තත්ත්වයත් සමග විදුලි සංදේශ නියාමන කොමිසන් සභාව ෆේස් බුක්, වට්ස් ඇප්, සහ වයිබර් යන සමාජ මාධ්‍ය වෙත පිවිසීම තාවකාලිකව අත්හිටුවනු ලැබුවේ පසුගිය බදාදායි.

මේ අතර, ෆේස්බුක් ඇතුළු සමාජ මාධ්‍ය තහනම සම්බන්ධයෙන් තම කොමිසමට ලැබුණු පැමිණිලි සම්බන්ධයෙන් විදුලි සංදේශ නියාමන කොමිෂන් සභාව සමඟ සාකච්ඡා කරන බව ශ්‍රී ලංකා මානව හිමිකම් කොමිසමද ප්‍රකාශ කළා.

එමෙන්ම, කොළඹ අද පැවති මාධ්‍ය හමු කිහිපයකදීද ෆේස්බුක් ඇතුළු සමාජ මාධ්‍ය තහනම සම්බන්ධයෙන් අදහස් පළ වුණා.  

මේ අතර දකුණු පළාත් සභා මන්ත්‍රි චන්න සාලිය මෙන්ඩිස් අද පළාත් සභා සැසිවාරයට සහභාගිවූයේ සමාජජාල ප්‍රවේශ අවහිර කිරීමට එරෙහි පුවරුද රැගෙනයි.

එහිදී පළාත් සභා මන්ත්‍රී චන්න සාලිය මෙන්ඩිස් සහ දකුණු පළාත් සභා මන්ත්‍රී අශෝක ධනවංශ අතර වචන හුවමාරුවක්ද හටගත්තා.  

Make a Comment
Make a Comment

DOWNLOAD HIRUNEWS APP ON ANDROID & APPLE
You may also like :
විල්පත්තුවේ දිවි ගෙවන දිවියන්ගේ දිවි රැඟුම්
Friday, 15 June 2018 - 20:06
විල්පත්තුව ජාතික වනෝද්‍යානයේ මේ දිනවල ශ්‍රී ලංකාවට අවේනික දිවියන් බහුලව දැකිය හැකිබව වාර්තා... Read More
News Image
Hiru News Programme Segments
468 Views
3,667 Views
4,401 Views
3,634 Views
16 Views
34,808 Views
Top