එක්සත් ජාතීන්ගේ සාම සාධක මෙහෙයුම් පිළිබඳ විශේෂ උපදේශන කමිටුවෙන් එක්සත් ජාතීන්ගේ ශී‍්‍ර ලංකා නියෝජ්‍ය නිත්‍ය නියෝජිත මේජර් ජෙනරාල් ශවේන්ද්‍ර සිල්වා ඉවත් කර නොමැති බව රාජ්‍ය තාන්ති‍්‍රක ආරංචි මාර්ග සඳහන් කළා.  ප‍්‍රංශ පුවත් සේවය අද (23) වාර්තා කර තිබුණේ මේජර් ජනරාල් ශවේන්ද්‍ර සිල්වා අදාළ උපදේශන කමිටුවට අවශ්‍ය නොවන බව ඊයේ රැස් වූ මෙම විශේෂ උපදේශන කමිටු රැස්වීමේදී එහි ප‍්‍රධානී ලූවිස් ෆ්‍රෙචෙට් ප‍්‍රකාශ කර ඇති බවයි. එමෙන්ම මෙම රැස්වීම සඳහා එක්සත් ජාතීන්ගේ ශී‍්‍ර ලංකා නියෝජ්‍ය නිත්‍ය නියෝජිතවරයා සහභාගී වුවද අනෙකුත් සාමාජිකයින් ඔහු සමග කතා බහ කර නොමැති බවත් කිසිදු ලේඛණයක් ඔහු වෙත ලබාදි නොමැති බවත්, ප‍්‍රංශ පුවත් සේවයේ වාර්තාවේ දැක්වුණා.

 
කෙසේ වෙතත්, මෙම මාධ්‍ය වාර්තා පිළිබඳ විමසීම සඳහා හිරු ප‍්‍රවෘත්ති අංශය නිව්යෝර්ක් නුවර සිටින මේජර් ජෙනරාල් ශවේන්ද්‍ර සිල්වා දුරකතනය ඔස්සේ සම්බන්ධ කර ගත්තා. ඔහු එහිදී කියා සිටියේ අද දිනයේත් තමත් අදාළ කමිටු රැස්වීමට සහභාගී වන බවයි. පරාජයට පත් එල්.ටී.ටී.ඊ. සංවිධානයට පක්ෂපාතී ඇතැම් පිරිස් මෙවැනි අසත්‍ය ප‍්‍රචාර සිදු කරන බවයි නියෝජ්‍ය නිත්‍ය නියෝජිතවරයා සඳහන් කළේ. ඔහු වැඩිදුරටත් කියා සිටියේ  මේ සම්බන්ධයෙන් පැහැදිලි ප‍්‍රකාශයක් හෙට දිනයේ සිදු කරන බවයි. සාම සාධක කටයුතු සම්බන්ධයෙන් සහ ඒ පිළිබඳව පැන නගින ගැටලූ පිළිබඳව උපදේශනය වෙනුවෙන් එක්සත් ජාතීන්ගේ මහ ලේකම්වරයා විසින් පත්කර ඇති  මෙම කමිටුව සාමාජිකයින් 10 දෙනෙකුගෙන් සැදුම් ලබනවා.  ඉන් 05 දෙනෙකු එක්සත් ජාතීන්ගේ මහ ලේකම්වරයා විසින් පත්කර ඇති අතර, ඉතිරි සාමාජිකයින් පත්කර ඇත්තේ කලාපීය රටවල් විසිනුයි. මේ අනුව මෙම කමිටුව සඳහා ආසියා පැසිපික් කලාපීය රටවල් විසින් මේජර් ජනරාල් ශවේන්ද්‍ර සිල්වා නම්කර තිබුණා.