නේපාලයේ බලයෙන් පහ කෙරුණු ගයිනේන්ද්‍ර රජු, තමා නැවතත් එරට රජ කිරුළ ලබාගැනීමට අපේක්ෂා කරන බව ප‍්‍රකාශ කළා. බි‍්‍රතාන්‍ය රූපවාහිනී සේවා සමග සාකච්ඡාවකට සහභාගි වෙමින් ඔහු කියා සිටියේ ව්‍යවස්ථාදායක රජ කිරුළක් බිහිකිරීම සඳහා 2006 වසරේදී තමා නේපාල දේශපාලන පක්ෂ සමග එකඟත්වයකට පැමිණි බවයි. එහෙත් නේපාල රජය, එරට රජ කිරුළ මුළුමනින්ම අහෝසි කිරීමට 2008 වසරේදී පියවර ගත්තා. ගයිනේන්ද්‍ර රජු කියා සිටින්නේ තමා නේපාලයේ රජ කිරුළ අපේක්ෂා කළද එහි දේශපාලනයට ඇඟිලි ගැසීමට අවශ්‍යතාවයක් නොමැති බවයි. ගයිනේන්ද්‍ර රජු මෙම ප‍්‍රකාශය කර ඇත්තේ නේපාලය තුළ දේශපාලන අර්බුදයක් මතුව ඇති මොහොතකයි. එරට ව්‍යවස්ථාදායක සභාව විසුරුවා හැර ඇත්තේ නව නේපාල ව්‍යවස්ථාව පිළිබඳ එකඟත්වයකින් තොරවයි. නොවැම්බරයේ නව මැතිවරණයක් පැවැත්වෙන අතර දැනට එහි දේශපාලන රික්තයක් ඇතිවී තිබෙන බවයි විචාරකයන් පෙන්වා දෙන්නේ. ගයිනේන්ද්‍ර රජු 2006 වසරේදී නේපාලයේ  රජ කිරුළෙන් ඉවත්වූයේ සති ගණනාවක් තිස්සේ එහි පැවති රාජ්‍ය විරෝධී උද්ඝෝෂණවලින් අනතුරුවයි.