පසුගිය 6 වැනිදා ජනාධිපති මහින්ද රාජපක්ෂ මහතා පාර්ලිමේන්තුවට ගියේ තමන් අමාත්‍ය ධූර දරන අමාත්‍යාංශවල උපදේශක කාරක සභාවල රැස්වීම්වලට සහභාගිවීමටයි. මෙම කාරක සභාවලට විපක්ෂයේ මන්ත‍්‍රීවරුන් පිරිසක්ද එක්ව සිටියා. සජිත් පේ‍්‍රමදාස, ගයන්ත කරුණාතිලක, දයාසිරි ජයසේකර, සුනිල් හඳුන්නෙත්තිද ඒ අතර වුණා. ජනාධිපතිවරයා මෙම උපදේශක කාරක සභා රැස්වීම මෙහෙයවූයේ ආකර්ශනීය ලෙස විහිලූ තහලූ කරමින්. කෙසේ වෙතත් ජනාධිපතිවරයාගේ පාර්ලිමේන්තු කටයුතු ලේකම් කුමාරසිරි හෙට්ටිගේ පසුව ගයන්ත මන්ත‍්‍රීවරයාගෙන් මෙවැනි ප‍්‍රශ්නයක් විමසුවා.

‘‘ඔබතුමාලා වෙන කාරක සභාවලදි නම් දිගට හරහාට ප‍්‍රශ්න අහනවා. අද මොකද?’’
 

‘‘මං බලාගෙන හිටියේ ජනාධිපතිතුමා සාකච්ඡාව මෙහෙයවන හැටි. අපිටත් කොච්චර ඉගෙන ගන්න දේවල් තියෙනවද?’’

ගයන්ත එසේ කියද්දී සුනිල් හඳුන්නෙත්ති මන්ත‍්‍රීවරයා මෙසේ කියා සිටියා.

‘‘අපි අහන්නේ මොනවාද? ජනාධිපතිතුමාම ප‍්‍රශ්න මතුකරමින් උත්තරත් දෙනවානේ.’’