வக்வெல்ல நீர் சுத்திகரிப்பு நிலையத்தில் மேற்கொள்ளப்படவுள்ள அத்தியாவசிய பராமரிப்புப் பணிகள் காரணமாக, நாளை (10) காலி மாநகரசபை அதிகாரப் பிரதேசத்திற்குட்பட்ட பகுதிகளில் 14 மணித்தியாலங்களுக்கு நீர் விநியோகம் முழுமையாக நிறுத்தப்படவுள்ளதாக தேசிய நீர் வழங்கல் மற்றும் வடிகாலமைப்புச் சபை அறிவித்துள்ளது.

பயங்கரவாதத் தடுப்புச் சட்டத்தின் கீழ் கைது செய்யப்பட்டு, தற்போது கொழும்பு தேசிய மருத்துவமனையில் அனுமதிக்கப்பட்டுள்ள முன்னாள் அரச புலனாய்வுப் பிரிவின் பிரதானி மேஜர் ஜெனரல் சுரேஷ் சலே, மனிதாபிமானமற்ற முறையில் நடத்தப்படுவதாக ஐக்கிய தேசியக் கட்சி கடுமையான கண்டனத்தை வெளியிட்டுள்ளது.

அத்துடன், அவரது தற்போதைய நிலை குறித்து ஆராய்வதற்கு நாடாளுமன்றக் குழுவொன்றை அனுப்ப வேண்டும் என்றும் அக்கட்சி வலியுறுத்தியுள்ளது.

முன்னாள் அரச புலனாய்வுப் பிரிவு பிரதானியின் மருத்துவ நிலை திருப்திகரமாக இல்லை என்பதை அவரது மனைவியும் மகனும் அண்மையில் பகிரங்கமாக வெளிப்படுத்திய விபரங்களின் அடிப்படையில் உறுதிப்படுத்த முடியும் என ஐக்கிய தேசியக் கட்சி சுட்டிக்காட்டியுள்ளது.

மலேசியாவில் பணியாற்றிய பின்னர், மேஜர் ஜெனரல் சுரேஷ் சலே முன்னாள் ஜனாதிபதிகளான கோட்டாபய ராஜபக்ஷ மற்றும் ரணில் விக்ரமசிங்க ஆகியோரின் நிர்வாகங்களின் கீழ் அரச புலனாய்வுப் பிரிவின் பிரதானியாக நாட்டிற்குச் சேவையாற்றினார். இக்காலப்பகுதியில் அவர் மீது எவ்வித குற்றச்சாட்டுகளும் சுமத்தப்பட்டிருக்கவில்லை.

அவர் மீது தற்போது சுமத்தப்பட்டுள்ள குற்றச்சாட்டுகளில் அவர் ஈடுபட்டுள்ளாரா அல்லது அதற்கு அவரே பொறுப்பா என்பது இன்றைய முக்கிய பிரச்சினையல்ல என்று தெரிவித்துள்ள ஐக்கிய தேசியக் கட்சி, கைது செய்யப்பட்ட ஒரு நபர் தடுத்து வைக்கப்பட்டுள்ள போது எவ்வாறு நடத்தப்படுகிறார் என்பதே தற்போதைய பிரதான பிரச்சினை எனக் குறிப்பிட்டுள்ளது.

கைது செய்யப்பட்ட ஒரு நபரை சித்திரவதை செய்வதும், மனிதாபிமானமற்ற முறையில் நடத்துவதும் இலங்கை அரசியலமைப்பின் 11 ஆவது உறுப்புரைக்கு முற்றிலும் முரணானது. மேலும், இது 1966 ஆம் ஆண்டின் சிவில் மற்றும் அரசியல் உரிமைகள் பற்றிய சர்வதேச உடன்படிக்கையை (ICCPR) மீறும் செயலாகும் என ஐக்கிய தேசியக் கட்சி சுட்டிக்காட்டியுள்ளது.

கைது செய்யப்பட்ட ஒரு நபர், அரசியலமைப்பு மற்றும் சர்வதேச உடன்படிக்கைகளுக்கு இணங்கக்கூடிய வகையிலேயே நடத்தப்பட வேண்டும். இந்தச் சம்பவம் ஏற்கனவே சர்வதேச சமூகத்தின் தீவிர கவனத்தை ஈர்த்துள்ளது.

பயங்கரவாதத் தடுப்புச் சட்டத்தின் பிரிவு 9(B)(1)F இன் படி, 1994 ஆம் ஆண்டின் 22 ஆம் இலக்க சித்திரவதைக்கு எதிரான மாநாட்டின் மூலம் வழங்கப்பட்ட பாதுகாப்பிற்கு சந்தேக நபர் தகுதியுடையவர் என்பதை உறுதிப்படுத்துவது நீதவானின் பொறுப்பாகும்.

எனவே, இந்தச் சட்டத்தையும் அரசியலமைப்பையும் மீறி நடத்தப்படும் எந்தவொரு விசாரணை விசாரணையும் நீதிமன்ற அவமதிப்பாகக் கருதப்படலாம் என்பதுடன், இதற்கு அரசாங்கம் சட்டரீதியாகப் பொறுப்புக்கூற வேண்டியிருக்கும் என்றும் எச்சரிக்கப்பட்டுள்ளது.

சுரேஷ் சலே நடத்தப்படும் இந்த மனிதாபிமானமற்ற விதம் இயல்பாக்கப்பட்டால், எதிர்காலத்தில் இதே நிலைமை எதிர்க்கட்சிக் குழுக்களுக்கும் பொருந்தும் அபாயம் ஏற்படும் என ஐக்கிய தேசியக் கட்சி சுட்டிக்காட்டியுள்ளது.

மேலும், தேசிய மக்கள் சக்தி அரசாங்கம் பௌத்த மதத்தைக் கட்டுப்படுத்த பெரும் முயற்சி எடுத்து வரும் வேளையில், இந்தத் துஷ்பிரயோகப் போக்கு பௌத்த துறவிகளுக்கு எதிராகவும் செயல்படுத்தப்படலாம் என்றும், இந்த ஒட்டுமொத்த சூழ்நிலைகளும் தமது கட்சியின் தீவிர கவனத்தைப் பெற்றுள்ளதாகவும் ஐக்கிய தேசியக் கட்சி விடுத்துள்ள அறிக்கையில் தெரிவிக்கப்பட்டுள்ளது.

கொழும்பு பங்குச் சந்தையின் அனைத்துப் பங்கு விலைச் சுட்டெண் இன்று (09) அதிகரிப்பைப் பதிவு செய்துள்ளது.

அதனடிப்படையில், அனைத்துப் பங்கு விலைச் சுட்டெண் 143.89 புள்ளிகளால் அதிகரிப்பைப் பதிவு செய்துள்ளது.

அந்தவகையில், கொழும்பு பங்குச் சந்தையின் அனைத்துப் பங்குகளின் மொத்த விலைச் சுட்டெண் 0.67% அதிகரிப்பைப் பதிவு செய்து, இன்று 21,547.17 புள்ளிகளாகப் பதிவாகியுள்ளது.

அதன்படி, கொழும்பு பங்குச் சந்தையின் மொத்தப் புரள்வானது இன்றையதினம் 2.2 பில்லியன் ரூபாயாகப் பதிவாகியுள்ளது.