අන්දමන් දූපත් ආශ්රිත මුහුදු ප්රදේශයෙන් වහාම ඉවත් වන ලෙස බහුදින ධීවර යාත්රාවලට උපදෙස්
අන්දමන් දූපත් ආශ්රිත ගැඹුරු මුහුදු ප්රදේශයේ නිර්මාණය වී ඇති අඩු පීඩන කලාපය හේතුවෙන් ඉදිරි දින කිහිපයේදී තද සුළං සහ රළු මුහුදු තත්ත්වයක් ඇතිවීමේ අවදානම හේතුවෙන්, එම ප්රදේශයේ ධීවර කටයුතුවල නිරත වන සියලුම බහුදින ධීවර යාත්රා වහාම එම ප්රදේශවලින් ඉවත් වී ආරක්ෂිත මුහුදු ප්රදේශ වෙත යන ලෙස ධීවර හා ජලජ සම්පත් දෙපාර්තමේන්තුව ධීවරයින්ට උපදෙස් ලබා දී තිබෙනවා.පවතින කාලගුණික තත්ත්වය පිළිබඳව අද (21) පැවති මාධ්ය හමුවකදී ධීවර හා ජලජ සම්පත් දෙපාර්තමේන්තුවේ අධ්යක්ෂ ජනරාල් සුසන්ත කහවත්ත මේ බව සඳහන් කළා.කාලගුණ විද්යා දෙපාර්තමේන්තු නිවේදනවලට අනුව දිවයිනට නැගෙනහිරින් පිහිටි අන්දමන් දූපත් ආශ්රිත ගැඹුරු මුහුදු ප්රදේශයේ මෙම තත්ත්වය හටගෙන ඇති අතර, මෙම අඩු පීඩන කලාපය ක්රමයෙන් බලවත් වී ඉන්දියාව දෙසට ගමන් කර ඉන්දීය ගොඩබිම වෙත ළඟාවීමේ ප්රවණතාවක් පවතින බවයි ඔහු පැවසුවේ.මේ වන විටත් අන්දමන් සහ බෙංගාල බොක්ක උතුරු ප්රදේශ ආශ්රිතව රැකියාවේ නියුතු යාත්රා කඩිනමින් මෙම ප්රදේශයෙන් දුරස් වී ලංකාව දෙසට (දකුණු දිශාවට) හෝ වෙරළ දෙසට යාත්රා කරන ලෙස යාත්රාවල හිමිකරුවන්ට සහ කාර්ය මණ්ඩල වෙත ගොඩබිම සිට මෙන්ම ගුවන්විදුලි සන්නිවේදන උපකරණ හරහා ද දැනුම් දී තිබෙනවා.කෙසේ වෙතත්, තවමත් බහුදින ධීවර යාත්රා කිහිපයක් අදාල ප්රදේශයේ ධීවර කටයුතුවල නිරත වන බව නිරීක්ෂණය වී ඇති බැවින්, ඉදිරි දිනවල ඇතිවිය හැකි රළු මුහුදු තත්ත්වය සහ තද සුළං නිසා යාත්රාවලට හා කාර්ය මණ්ඩලයට සිදුවිය හැකි අනතුරු වළක්වා ගැනීමට කඩිනමින් ඉවත් වන ලෙසයි අධ්යක්ෂ ජනරාල්වරයා අවධාරණය කළේ.මෙම අඩු පීඩන කලාපයේ බලපෑම දිවයින වටා පිහිටි සෙසු මුහුදු ප්රදේශවලටද දැනීමේ හැකියාවක් පවතින බැවින්, කුඩා පරිමාණ ධීවර කටයුතුවල නිරත වන ධීවරයින්ද එදිනෙදා පවතින මුහුදු තත්ත්වය සහ සුළඟේ වේගය පිළිබඳව දැඩි ලෙස සැලකිලිමත් විය යුතු බව සඳහන්.කෙසේ වෙතත්, පවතින තත්ත්වය මත දිවයින පුරා ධීවර කටයුතු තහනම් කිරීමට මෙතෙක් තීරණය කර නැතත්, තත්ත්වය අඛණ්ඩව නිරීක්ෂණය කරමින් කාලගුණ විද්යා දෙපාර්තමේන්තු නිවේදනවලට අනුකූලව අවශ්ය උපදෙස් වරින් වර නිකුත් කරන බව හෙතෙම සඳහන් කළා.අතීතයේ අයහපත් කාලගුණික අවස්ථාවලදී ආරක්ෂිත උපදෙස් නොසලකා හැරීම සහ ජීවිත ආරක්ෂක කබා (Life Jackets) නොපැළඳීම හේතුවෙන් මිනිස් ජීවිත අහිමි වූ සිදුවීම් වාර්තා වී ඇති බව සිහිපත් කළ අධ්යක්ෂ ජනරාල්වරයා, ධීවර කටයුතු සඳහා මුහුදු යන අවස්ථාවේදී, මුහුදේ සිටින විට සහ නැවත වෙරළට පැමිණෙන සෑම අවස්ථාවකම අනිවාර්යයෙන්ම ජීවිත ආරක්ෂක කබා පැළඳ සිටින ලෙසත්, කාලගුණ නිවේදන ඉතා අවධානයෙන් අනුගමනය කරමින් මුහුදු යාම හෝ නොයාම තීරණය කරන ලෙසත් සියලුම ධීවරයින්ගෙන් ඉල්ලා සිටියා.
