බස්නාහිර සහ සබරගමුව පළාත්වලත් මහනුවර, නුවරඑළිය, ගාල්ල සහ මාතර දිස්ත්‍රික්කවලත් අද (12) වැසි වාර කිහිපයක් ඇති විය හැකි බව කාලගුණ විද්‍යා දෙපාර්තමේන්තුව නිවේදනයක් නිකුත් කරමින් සඳහන් කරනවා.එසේම වයඹ පළාතේ වැසි ස්වල්පයක් ඇති විය හැකියි.උතුරු, උතුරු - මැද, ඌව සහ නැගෙනහිර පළාත් වල පස්වරු 2.00න් පසුව තැනින් තැන වැසි හෝ ගිගුරුම් සහිත වැසි ඇති විය හැකි අතර, ඇතැම් ස්ථාන වලට මි. මී 50ට වැඩි තරමක තද වැසි ඇති විය හැකි බව සඳහන්.ගිගුරුම් සහිත වැසි සමග ඇති විය හැකි තාවකාලික තද සුළංවලින් සහ අකුණු මගින් සිදුවන අනතුරු අවම කර ගැනීමට අවශ්‍ය පියවර ගන්නා ලෙසයි එම දෙපාර්තමේන්තුව ජනතාවගෙන් ඉල්ලා සිටින්නේ.

ජීව විද්‍යාත්මක අවි නිපදවීමට සහාය විය හැකි ආකාරයෙන් සිය AI තාක්ෂණය භාවිත කිරීමට සිදුකළ උත්සාහයන් කිහිපයක් හඳුනාගෙන ඒවා වැළැක්වීමට කටයුතු කළ බව Anthropic සමාගම පවසනවා.එම තොරතුරු ඇතුළත් සිය නවතම වාර්තාව Anthropic සමාගම විසින් ඊයේ (11) නිකුත් කර ඇති බවයි BBC පුවත් සේවය වාර්තා කරන්නේ.මාධ්‍ය වාර්තා අනුව, එහි දැක්වෙන්නේ පසුගිය මාස අටක කාලය තුළ Claude Haiku, Sonnet සහ Opus යන AI මාදිලි අනිසි ලෙස භාවිත කිරීමට සිදුකළ උත්සාහයන් හඳුනාගෙන ඒවා අවහිර කළ බවයි.ජීව විද්‍යාත්මක අවි නිපදවීමට සහාය විය හැකි ආකාරයෙන් සිය AI මාදිලි භාවිත කළ පුද්ගලයන් සම්බන්ධ සිද්ධි පහක් පිළිබඳවද එම වාර්තාවේ විශේෂයෙන් සඳහන් කර ඇති බවටයි වාර්තා වෙන්නේ.Anthropic සඳහන් කර ඇත්තේ, නිසි ආරක්ෂක පියවර නොමැතිව ඉදිරිගාමී AI තාක්ෂණයේ ජීව විද්‍යාත්මක භාවිතය මගින් ඉතා බරපතළ සහ විනාශකාරී ප්‍රතිවිපාක ඇති විය හැකි බවයි.මේ අතර, Google සමාගමද සිය Gemini AI මෙවලම හරහා ආයුධයක් ලෙස භාවිත කළ හැකි ජීව විද්‍යාත්මක ද්‍රව්‍ය නිෂ්පාදනය සඳහා පියවරෙන් පියවර තාක්ෂණික මාර්ගෝපදේශයක් ලබාගැනීමට පුද්ගලයෙකු උත්සාහ කළ බව පසුගියදා අනාවරණය කර තිබෙනවා.Anthropic වාර්තාවට අනුව Claude AI තාක්ෂණය රුසියාව පදනම් කරගත් සයිබර් ඔත්තු බැලීමේ කණ්ඩායමකට සහ ඉරාන ප්‍රචාරක ආයතනයකට සම්බන්ධ පාර්ශ්වයන් විසින්ද භාවිත කර ඇති බව වාර්තා වෙනවා.ව්‍යාජ ආලය යෙදුම් සහ හෝටල් Wi-Fi වංචා, විරුද්ධ මත දරන්නන් හඳුනාගැනීම සඳහා සිදුකළ නිරීක්ෂණ කටයුතු, සයිබර් ප්‍රහාර සහ වංචා ඇතුළු විවිධ අනිසි භාවිතයන් සම්බන්ධයෙන්ද එම වාර්තාවේ සඳහන්.තවද, ගිනි අවි, මිසයිල, සන්නද්ධ ඩ්‍රෝන සහ බෝම්බ ඇතුළු යුධ උපකරණ සඳහා මෘදුකාංග මෙන්ම ඒවායේ ඉලක්කගත කිරීමේ සහ පාලන පද්ධති සංවර්ධනය කිරීමට Claude භාවිත කළ අවස්ථා හයක්ද හඳුනාගෙන ඇති බව Anthropic සඳහන් කර තිබෙනවා.මේ අතර, කෘත්‍රිම බුද්ධි තාක්ෂණයේ අවදානම් සම්බන්ධයෙන් ලොව පුරා අනතුරු ඇඟවීම් ඉහළ යමින් පවතින අතර, අමෙරිකානු සෙනෙට් සභික Beie Sanders විසින් දියුණු AI සංවර්ධනය තාවකාලිකව නතර කිරීම සහ කෘත්‍රිම සුපිරි බුද්ධිය තහනම් කිරීම සම්බන්ධයෙන් ඉල්ලීම් ඉදිරිපත් කර ඇති බව විදෙස් මාධ්‍ය සඳහන් කරනවා.කෙසේ වෙතත්, ජනපති ට්‍රම්ප් පසුගියදා ප්‍රකාශ කර ඇත්තේ AI තරගයෙන් ජය නොගතහොත් අමෙරිකාව ඉතා අසීරු තත්ත්වයකට පත්විය හැකි බවට තමන් අවධානය යොමු කර ඇති බවයි.

2026 කාන්තා ආසියානු කුසලාන ක්‍රිකට් තරගාවලියේ දෙවන අර්ධ අවසන් පූර්ව තරගයෙන් පාකිස්ථාන කාන්තා කණ්ඩායම කඩුලු 4 කින් පරාජය කරමින් අවසන් මහා තරගයේ හිමිකම් තහවුරු කර ගැනීමට ශ්‍රී ලංකා කාන්තා කණ්ඩායම සමත් වුණා.ඩුබායි ජාත්‍යන්තර ක්‍රිකට් ක්‍රීඩාංගණයේ පැවැති මෙම තරගයේ කාසියේ වාසිය දිනාගත් ශ්‍රී ලංකා නායිකා චමරි අතපත්තු ප්‍රථමයෙන් පන්දු යැවීමට තීරණය කළා.ඒ අනුව පන්දුවට පහරදුන් පාකිස්ථාන කණ්ඩායම නියමිත පන්දුවාර 20 අවසානයේ කඩුලු 5 ක් දැවී ලකුණු 130 ක් රැස් කරගත්තා.ලකුණු 131 ක ජයග්‍රාහී ඉලක්කයක් හඹාගිය ශ්‍රී ලංකා කණ්ඩායමට ආරම්භය යහපත් නොවූ අතර, නායිකා චමරි අතපත්තු (5) සහ සංජනා කාවින්දි (0) ලකුණු 5 ක් තුළ දැවී ගියා.ඉන් අනතුරුව ඉමේජා දුලානි ලකුණු 24 ක් රැස් කරමින් ඉනිම ගොඩනැගීමට උත්සාහ කළා.කෙසේ වෙතත්, ශ්‍රී ලංකා කණ්ඩායම ජයග්‍රහණය කරා ගෙන යාමට මධ්‍යම පෙළ පිතිකාරිනියන් වූ හර්ෂිතා සමරවික්‍රම සහ කවීෂා දිල්හාරි විශිෂ්ට සබඳතාවක් ගොඩනඟමින්, හර්ෂිතා පන්දු 31 කදී ලකුණු 36 ක් ලබාගත් අතර කවීෂා පන්දු 33 කදී ලකුණු 33 ක් රැස් කළා.තරගයේ අවසාන පන්දුවාරවලදී වේගවත් ඉනිමක් ක්‍රීඩා කළ නිලක්ෂි ද සිල්වා පන්දු 10 කදී නොදැවී ලකුණු 18 ක් සහ කෞෂානි නුත්‍යංගනා පන්දු 4 කදී හයේ පහරක් සමගින් නොදැවී ලකුණු 10 ක් ලබාගනිමින් පන්දුවාර 18.4 කදී කඩුලු 6 ක් පමණක් දැවී ශ්‍රී ලංකා කණ්ඩායම ජයග්‍රහණය කරා ගෙන යනු ලැබුවා.පන්දුවෙන් දස්කම් පෑ පාකිස්ථාන නායිකා ෆාතිමා සනා ලකුණු 21 කට කඩුලු 4 ක් දවාගනිමින් ශ්‍රී ලංකා පිතිකාරිනියන්ට දැඩි තර්ජනයක් එල්ල කළද එය තරගය ජය ගැනීමට ප්‍රමාණවත් වූයේ නැහැ.මෙම ජයග්‍රහණයත් සමග ශ්‍රී ලංකා කාන්තා කණ්ඩායම ආසියානු කුසලාන අවසන් මහා තරගයේදී ඉන්දියාව සමගින් තරග වැදීමට නියමිතයි.