රජයේ වෛද්‍යවරුන් ඉසුරුපායේ රැය පහන් කරයි

Thursday, 15 September 2016 - 7:20

%E0%B6%BB%E0%B6%A2%E0%B6%BA%E0%B7%9A+%E0%B7%80%E0%B7%9B%E0%B6%AF%E0%B7%8A%E2%80%8D%E0%B6%BA%E0%B7%80%E0%B6%BB%E0%B7%94%E0%B6%B1%E0%B7%8A+%E0%B6%89%E0%B7%83%E0%B7%94%E0%B6%BB%E0%B7%94%E0%B6%B4%E0%B7%8F%E0%B6%BA%E0%B7%9A+%E0%B6%BB%E0%B7%90%E0%B6%BA+%E0%B6%B4%E0%B7%84%E0%B6%B1%E0%B7%8A+%E0%B6%9A%E0%B6%BB%E0%B6%BA%E0%B7%92
ජනප්‍රිය පාසල් ඉල්ලා රජයේ වෛද්‍ය නිලධාරීන්ගේ සංගමයේ වෛද්‍යවරුන් තවමත් අධ්‍යාපන අමාත්‍යාංශ පරිශ්‍රයේ රැඳී සිටිනවා.

ඊයේ පෙරවරුවේ අධ්‍යාපන අමාත්‍යවරයාගෙන් සාකච්ඡාවක් ඉල්ලා ඉසුරුපාය  වෙත ගිය රජයේ වෛද්‍යවරුන් රැය පහන් කළේ අධ්‍යාපන අමාත්‍යාංශ පරිශ්‍රයේයි.

රජයේ වෛද්‍යවරුන් 200 ක් පමණ මේ වනවිටත් අධ්‍යාපන අමාත්‍යාංශ පරිශ්‍රයේ රැඳී සිටිනවා.  

කෙසේ වෙතත්, මෙම වෛද්‍යවරුන් පිරිස රැඳී සිටින අධ්‍යාපන අමාත්‍යාංශ ශ්‍රවණාගාරයේ විදුලිය කපා හැරීමට ඊයේ රාත්‍රියේ කටයුතු කළ බවයි රජයේ වෛද්‍ය නිලධාරීන්ගේ සංගමයේ මධ්‍යම කාරක සභික වෛද්‍ය ප්‍රසාද් රණවීර සඳහන් කළේ.

අධ්‍යාපන අමාත්‍යාංශයේ මාධ්‍ය ඒකකය මේ සම්බන්ධයෙන් ඊයේ නිවේදනයක් නිකුත් කරනු ලැබුවා.

එහි සඳහන් වුණේ තම දරුවන්ට අගනුවර සහ වෙනත් තදාසන්න ප්‍රදේශවල ඇති ජනප්‍රියතම ජාතික පාසල් ලබාදෙන ලෙස රජයේ වෛද්‍ය නිලධාරීන්ගේ සංගමය දිගින් දිගටම අමාත්‍යාංශයට බලපෑම් එල්ල කරමින් සිටින බවයි.

දිවයින පුරා ජාතික පාසල් 352 ක් පවතින නමුත්, රාජකාරී පදනම මත ස්ථාන මාරු ලබන බොහෝ වෛද්‍යවරුන්ගේ ඉල්ලීම වී ඇත්තේ ජනප්‍රිය පාසල් 12 කටත් අඩු ප්‍රමාණයකට බවයි අධ්‍යාපන අමාත්‍යාංශය නිකුත් කළ නිවේදනයේ දැක්වෙන්නේ.

කොළඹ රාජකීය, ආනන්ද, විශාඛා, මහනුවර ධර්මරාජ, කිංග්ස්වුඩ්, මහාමායා, උසස් බාලිකා, කුරුණෑගල මලියදේව බාලක සහ බාලිකා පාසල් ඊට ඇතුළත්.

තම වෘත්තීය සංගමයේ බලය යොදා ගනිමින් අසාධාරණ ඉල්ලීම් සිදුකරමින් ඔවුන්ගේ දරුවන් පමණක් ජනප්‍රිය පාසල්වලට ඇතුළත් කර ගැනීමට රජයේ වෛද්‍ය නිලධාරීන්ගේ සංගමය උත්සාහ කිරීම කණගාටුවට කරුණක් බවද අධ්‍යාපන අමාත්‍යාංශය සඳහන් කරනවා.

මේ සම්බන්ධයෙන් මාධ්‍ය වෙත අදහස් පළ කරමින් අධ්‍යාපන අමාත්‍ය අකිල විරාජ් කාරියවසම් කියා සිටියේ රජයේ වෛද්‍ය නිලධාරීන්ගේ සංගමය සිදුකරන මෙම ඉල්ලීම අසාධාරණ බවයි.

මේ අතර, මෙම ගැටලුව මුල්කරගනිමින් රජයේ වෛද්‍ය නිලධාරීන්ගේ සංගමය කුරුණෑගල, මහනුවර සහ මාතර දිස්ත්‍රික්කවල රජයේ රෝහල්වල අද පෙරවරු අටේ සිට දහවල් 12 දක්වා පැය  හතරක සංකේත වර්ජනයකද නිරතවනවා.