ජ’පුර හෙද වර්ජනය අවසන්

Friday, 12 January 2018 - 12:56

%E0%B6%A2%E2%80%99%E0%B6%B4%E0%B7%94%E0%B6%BB+%E0%B7%84%E0%B7%99%E0%B6%AF+%E0%B7%80%E0%B6%BB%E0%B7%8A%E0%B6%A2%E0%B6%B1%E0%B6%BA+%E0%B6%85%E0%B7%80%E0%B7%83%E0%B6%B1%E0%B7%8A
ශ්‍රී ජයවර්ධනපුර රෝහලේ දින 10 ක් ක්‍රියාත්මක වූ හෙද වර්ජනය අද (12) පෙරවරුවේ අත්හිටුවනු ලැබුවා.

ඒ රෝහල් බලධාරින් සහ වෘත්තීය සමිති අතර පැවති සාකච්ඡාවකින් අනතුරුවයි.

දෛනික රාජකාරියට වාර්තා කිරීමේ දී ඇඟීලි සලකුණු ක්‍රමය ක්‍රියාත්මක කිරීමට විරෝධය පළ කරමින් මෙම වර්ජනය ආරම්භ කෙරුණේ පසුගිය බදාදා දිනයේදීයි.

ඇඟීලි සලකුණු ක්‍රමය ක්‍රියාත්මක නොකරන ලෙස හෙද සංගම් එහිදී ඉල්ලා සිටියා.

ජයවර්ධනපුර රෝහලේ ආරම්භ කළ මෙම වර්ජනයට සහය දක්වමින් ඊයේ (11) දිනයේදී කොළඹ ජාතික රෝහලේ සහ අක්ෂි රෝහලේ හෙද නිලධාරින් ද සංකේත වර්ජනයක් ද ආරම්භ කළා.

 පැය 24 ක් පුරා පැවති මෙම සංකේත වැඩවර්ජනය අවසන් වූයේ අද පෙරවරු 7 ටයි.

අද (12) පෙරවරුවේ රෝහල් බලධාරින් සහ හෙද සංගම් අතර පැවති සාකච්ඡාවේදී ඇඟීලි සලකුණු ක්‍රමය තාවකාලිකව අත්හිටුවීමට තීරණය කෙරුණා.

එමෙන්ම, ප්‍රායෝගික ගැටලූ සම්බන්ධයෙන් වන සාකච්ඡා, අමාත්‍යාංශ කමිටුවක් මගින් සිදුකිරීමට ද තීරණය වී තිබෙනවා.

මෙම එකඟතාව තම සංගමයට ලිඛිතව ලැබීමෙන් අනතුරුව, වර්ජනය අත්හිටුවීමට තීරණය කළ බවයි රාජ්‍ය සේවා එක්සත් හෙද සංගමයේ නියෝජිතයෙකු හිරු ප්‍රවෘත්ති අංශයට සඳහන් කළේ.

මෙම සාකච්ඡාවේදී එකඟතාවයකට පැමිණි කරුණු පිළිබඳව හිරු ප්‍රවෘත්ති අංශය ශ්‍රී ජයවර්ධනපුර රෝහලේ අධ්‍යක්ෂ වෛද්‍ය සුසිත සේනාරත්නගෙන් ද විමසීමක් කළා.

ඔහු කියා සිටියේ ඇඟීලි සලකුණු ක්‍රමය තාවකාලිකව ඉවත් කර ගැනීමට එකඟත්වය පළ කළ බවයි.