කුරුණෑගල වෛද්‍යවරයාට එරෙහි පැමිණිලි 129 දක්වා ඉහළට

Wednesday, 29 May 2019 - 7:30

%E0%B6%9A%E0%B7%94%E0%B6%BB%E0%B7%94%E0%B6%AB%E0%B7%91%E0%B6%9C%E0%B6%BD+%E0%B7%80%E0%B7%9B%E0%B6%AF%E0%B7%8A%E2%80%8D%E0%B6%BA%E0%B7%80%E0%B6%BB%E0%B6%BA%E0%B7%8F%E0%B6%A7+%E0%B6%91%E0%B6%BB%E0%B7%99%E0%B7%84%E0%B7%92+%E0%B6%B4%E0%B7%90%E0%B6%B8%E0%B7%92%E0%B6%AB%E0%B7%92%E0%B6%BD%E0%B7%92+129+%E0%B6%AF%E0%B6%9A%E0%B7%8A%E0%B7%80%E0%B7%8F+%E0%B6%89%E0%B7%84%E0%B7%85%E0%B6%A7
අත්අඩංගුවට ගැනුණු කුරුණෑගල ශික්ෂණ රෝහලේ ප්‍රසව හා නාරි වෛද්‍ය ඒකකයේ සේවය කළ වෛද්‍ය සෙයිගු සියාබ්දීන් මොහොමඞ් සාෆිට එරෙහිව මේ වනවිට මව්වරුන් 129 දෙනෙකුගෙන් පැමිණිලි ලැබී තිබෙනවා.

කුරුණෑගල ශික්ෂණ රෝහලට මව්වරුන් 114 දෙනෙකු ඊයේ දිනය වන විට පැමිණිලි කර තිබූ අතර, දඹුල්ල මූලික රෝහලට පැමිණිලි 13ක් සහ ගලේවෙල දිසා රෝහලට පැමිණිලි 2ක් ඉදිරිපත්ව තිබුණා.

කුරුණෑගල ශික්ෂණ රෝහලේ සේවය කළ මෙම වෛද්‍යවරයා පසුගිය සිකුරාදා රාත්‍රියේ අත්අඩංගුවට ගනු ලැබූ අතර, වැඩිදුර පරීක්ෂණ සඳහා අපරාධ පරීක්ෂණ දෙපාර්තමේන්තුව වෙත භාර දෙනු ලැබුවා.

එමෙන්ම, වෛද්‍ය සාෆිට එරෙහිව පරීක්ෂණ කඩිනම් කරන ලෙස ඉල්ලා කුරුණෑගල නගරයේ කඩ සාප්පු වසා දමා ඊයේ හර්තාල් ව්‍යාපාරයක් ක්‍රියාත්මක වුණා.

ඊට අමතරව මෙම වෛද්‍යවරයාට විරෝධය පළ කරමින් ප්‍රදේශයේ විහාරස්ථානවල භික්ෂූන් වහන්සේලා, සිවිල් සංවිධාන සහ කුරුණෑගල ශික්ෂණ රෝහලේ වෛද්‍යවරුන් ඇතුලු හෙද කාර්ය මණ්ඩලයේ පිරිස් ඊයේ දහවල් රෝහල ඉදිරිපිට විරෝධතාවයක ද නිරත වුණා.

එමෙන්ම, වෛද්‍යවරයාට එල්ල වී ඇති චෝදනා සම්බන්ධයෙන් විමර්ශනය කිරීම සඳහා සෞඛ්‍ය අමාත්‍යාංශය 6 දෙනෙකුගෙන් යුත් කමිටුවක් පත් කෙරුණු අතර කමිටු සාමාජිකයින් ඊයේ කුරුණෑගල රෝහල වෙත ගොස් තිබෙනවා.

කෙසේ වෙතත් මෙම කමිටුවට කිසිදු සහයක් නොදැක්වීමට කුරුණෑගල රෝහලේ වෛද්‍ය සහ හෙද කාර්ය මණ්ඩලය තීරණය කර තිබූ අතර එය රෝහල් අධ්‍යක්ෂවරයා වෙත ලිඛිතව දැනුම් දී තිබුණා.

එමෙන්ම සෞඛ්‍ය අමාත්‍යවරයා පත් කළ මෙම කමිටුව පිළිනොගැනීමට රජයේ වෛද්‍ය නිළධාරීන්ගේ සංගමය ද තීරණයක් ගෙන තිබෙනවා.

මේ අතර, වැඩබලන සෞඛ්‍ය සේවා අධ්‍යක්ෂ ජනරාල්වරයා ඊයේ නිවේදනයක් නිකුත් කරමින් කියා සිටියේ වෛද්‍ය පරිපාලකයින් මාධ්‍ය හමු කැඳවීමේදී සහ තාක්ෂණික කරුණු හැර වෙනත් කරුණු ප්‍රසිද්ධියේ පැවසීමේදී සෞඛ්‍ය අමාත්‍යාංශ ලේකම්වරයාගෙන් අවසර ලබාගත යුතු බවටයි.

ඉන් පරිබාහිරව කටයුතු කරන වෛද්‍ය පරිපාලකයින්ට එරෙහිව විමර්ශන ක්‍රියාත්මක කරන බව ද එම නිවේදනයේ දැක්වුණා.