පිළිකාකාරක මිරිස් වෙළඳපොලට යැවූ ආනයනකරුවන්ට නඩු

Monday, 30 September 2019 - 12:40

%E0%B6%B4%E0%B7%92%E0%B7%85%E0%B7%92%E0%B6%9A%E0%B7%8F%E0%B6%9A%E0%B7%8F%E0%B6%BB%E0%B6%9A+%E0%B6%B8%E0%B7%92%E0%B6%BB%E0%B7%92%E0%B7%83%E0%B7%8A+%E0%B7%80%E0%B7%99%E0%B7%85%E0%B6%B3%E0%B6%B4%E0%B7%9C%E0%B6%BD%E0%B6%A7+%E0%B6%BA%E0%B7%90%E0%B7%80%E0%B7%96+%E0%B6%86%E0%B6%B1%E0%B6%BA%E0%B6%B1%E0%B6%9A%E0%B6%BB%E0%B7%94%E0%B7%80%E0%B6%B1%E0%B7%8A%E0%B6%A7+%E0%B6%B1%E0%B6%A9%E0%B7%94
පිළිකා කාරක අඩංගු වියලි මිරිස් මෙටි‍්‍රක් ටොන් 200 කට ආසන්න ප්‍රමාණයක් රේගු කොන්දේසි උල්ලංඝනය කරමින් වෙළඳපොලට මුදාහැරීම සම්බන්ධයෙන් අදාළ ආනයනකරුවන්ට එරෙහිව නීතිමය පියවර ගන්නා බව රේගු දෙපාර්තමේන්තුව පවසනවා.

එහි ප්‍රකාශකයෙකු සඳහන් කළේ ආනයනකරුවන් 16 දෙනෙකු විසින් මෙම වියලි මිරිස් තොග මෙරටට ගෙන්වා ඇති බවයි. ඔවුන්ට එරෙහිව රේගු නඩුවක් පැවරීමට අවශ්‍ය පියවර ගනිමින් සිටින බව රේගු දෙපාර්තමේන්තුවේ අදාළ ප්‍රකාශකයා කියා සිටියා.

පිලිකා කාරක අඩංගු මෙම වියලි මිරිස් තොගය මෙරටට ආනයනය කර ඇත්තේ ඉන්දියාවේ සිටයි.

මෙරටට ආනයනය කරන ආහාර ද්‍රව්‍ය, ආහාර පරීක්ෂක විසින් සාම්පල් පරීක්ෂාවක් සිදුකර එහි නිර්දේශ ලබාදෙන තෙක් පෞද්ගලික ගබඩාවල රඳවා තබාගැනීමට රේගු දෙපාර්තමේන්තුව ආනයනකරුවන්ට අවසර ලබාදෙන්නේ දැඩි කොන්දේසි මතයි.

ආහාර පරීක්ෂකගේ නිර්දේශය ලැබෙන තෙක් එම ආහාර ද්‍රව්‍ය වෙළඳපොලට මුදාහැරීම තහනම් වනවා.  

ආහාර පරීක්ෂක විසින් සිදුකළ සාම්පල පරීක්ෂාවේදී අදාළ වියලි මිරිස් තොගයේ කිලෝග්‍රෑමයක අඩංගු විය හැකි ඇෆ්ලටොක්සින් මට්ටම මිලිග්‍රෑම් 30 ඉක්මවා ඇති බව අනාවරණ වී ඇති බවයි සෞඛ්‍ය අමාත්‍යාංශයේ පරිසර වෘත්තිය හා සෞඛ්‍ය ආරක්ෂතා කාර්යාංශයේ ආහාර ස්වස්ථතාව භාර විශේෂඥ වෛද්‍ය සපුමල් ධනපාල හිරු ප්‍රවෘත්ති අංශයට සඳහන් කළේ.

ඇෆ්ලටොක්සින් යනු පිළිකා, අක්මාවේ සහ වකුගඩුවල රෝග රැසකට හේතුවන දිලීරයක් වන අතර, මෙරට 1980 අංක 26 දරණ  ආහාර පනත අනුව ඇෆ්ලටොක්සින් මට්ටම කිලෝග්‍රෑමයකට මිලිග්‍රෑම් 30 ඉක්මවන ආහාර පරිභෝජනයට නුුසුදුසු බවට සඳහන් කර තිබෙනවා.

අදාළ වියලි මිරිස් සම්බන්ධයෙන් ආහාර පරීක්ෂකගේ නිර්දේශය රේගු දෙපාර්තමේන්තුවට ලබාදී ඇති අතර, ඒ අනුව අවශ්‍ය පියවර ගන්නා ලෙසටද දැනුම්දී ඇති බව පරිසර වෘත්තිය හා සෞඛ්‍ය ආරක්ෂතා කාර්යාංශයේ ආහාර ස්වස්ථතාව භාර විශේෂඥ වෛද්‍ය සපුමල් ධනපාල වැඩිදුරටත් කියා සිටියා.

කෙසේ වෙතත් රේගු දෙපාර්තමේන්තුව කළ සොයාබැලීමකදී අනාවරණ වී ඇත්තේ මෙටි‍්‍රක් ටොන් 200 ක් පමණ වන අදාළ වියලි මිරිස් ගබඩාවල නොමැති බවටයි.

මේ අතර සෞඛ්‍ය අමාත්‍යාංශයේ ආහාර පාලන ඒකකයේ නියෝගයක් ලද වහාම වෙළඳපොල තුළ විශේෂ පරීක්ෂාවක් සිදුකිරීමට කටයුතු කරන බවයි ශ්‍රී ලංකා මහජන සෞඛ්‍ය පරීක්ෂක සංගමයේ ලේකම් මහින්ද බාලසූරිය කියා සිටියේ.