වූහාන් සිට පැමිණි 33 දෙනා නිවෙස් වෙත යාමට පෙර යුද හමුදා මූලස්ථානයට

Friday, 14 February 2020 - 13:02

%E0%B7%80%E0%B7%96%E0%B7%84%E0%B7%8F%E0%B6%B1%E0%B7%8A+%E0%B7%83%E0%B7%92%E0%B6%A7+%E0%B6%B4%E0%B7%90%E0%B6%B8%E0%B7%92%E0%B6%AB%E0%B7%92+33+%E0%B6%AF%E0%B7%99%E0%B6%B1%E0%B7%8F+%E0%B6%B1%E0%B7%92%E0%B7%80%E0%B7%99%E0%B7%83%E0%B7%8A+%E0%B7%80%E0%B7%99%E0%B6%AD+%E0%B6%BA%E0%B7%8F%E0%B6%B8%E0%B6%A7+%E0%B6%B4%E0%B7%99%E0%B6%BB+%E0%B6%BA%E0%B7%94%E0%B6%AF+%E0%B7%84%E0%B6%B8%E0%B7%94%E0%B6%AF%E0%B7%8F+%E0%B6%B8%E0%B7%96%E0%B6%BD%E0%B7%83%E0%B7%8A%E0%B6%AE%E0%B7%8F%E0%B6%B1%E0%B6%BA%E0%B6%A7
චීනයේ වූහාන් සිට දිවයිනට රැගෙන ආ ශ්‍රී ලාංකිකයින් 33 දෙනා දින 13 ක නිරෝධායන කාලසීමාවකින් පසු දියතලාව යුද හමුදා කඳවුරෙන් අද උදෑසන නික්ම ගියා.

ඔවුන් අද පස්වරුවේ අකුරේගොඩ යුද හමුදා මූලස්ථානයේදී වැඩබලන ආරක්ෂක මාණ්ඩලික ප්‍රධානී, යුද හමුදාපති ලූතිනන් ජෙනරාල් ශවේන්ද්‍ර සිල්වා හමුවීමට නියමිත අතර, පසුව සිය නිවෙස් වෙත පිටත්ව යාමට නියමිතයි.

බස් රථයකින් අකුරේගොඩ යුද හමුදා මූලස්ථානය වෙත මේ වනවිට ඔවුන් රැගෙන එන අතර, අද උදෑසන ද එම පිරිස සම්පූර්ණ වෛද්‍ය පරීක්ෂාවකට ලක් කර තිබෙනවා.

අද පස්වරුවේ මෙම පිරිස අකුරේගොඩ යුද හමුදා මූලස්ථානයේදී විශේෂ මාධ්‍ය හමුවකට සහභාගිවීමට නියමිත බවයි වාර්තා වන්නේ.

ශ්‍රී ලංකන් ගුවන් සේවයට අයත් විශේෂ ගුවන් යානයකින් මෙම පිරිස දිවයිනට රැගෙන එනු ලැබුවේ පෙබරවාරි මස 01 වැනිදා උදෑසනයි.

අනතුරුව නිරෝධායන කටයුතු සඳහා ඔවුන් දියතලාව යුද හමුදා කඳවුර වෙත රැගෙන යනු ලැබුවා

මේ අතර, නව කොරෝනා වෛරසය ආසාදනය වී ඇති බවට සැක කෙරෙන පුද්ගලයින් 08 දෙනෙකු දිවයිනේ රෝහල් කිහිපයක තවදුරටත් ප්‍රතිකාර ලබනවා.

IDH හෙවත් ජාතික බෝවන රෝග විද්‍යායතනයේ 04 දෙනෙකු, කුරුණෑගල රෝහලේ දෙදෙනෙකු, ගම්පහ සහ කරාපිටිය රෝහල්වල එක් අයෙකු බැගින් එලෙස ප්‍රතිකාර ලබන බවයි වසංගත රෝග විද්‍යා ඒකකය සඳහන් කළේ.

මෙරට සංචාරයක් සඳහා පැමිණ සිටියදී කොරෝනා වෛරසය වැළඳී ඇති බවට තහවුරු වූ චීන ජාතික කාන්තාව දින 18 කට ආසන්න කාලයක් ජාතික බෝවන රෝග විද්‍යායතනයේ ප්‍රතිකාර ලබමින් සිටිනවා.

මේ අතර, කොවිඩ් - නයින්ටීන් හෙවත් කොරෝනා වෛරසය ආසාදනය වී මියගිය පුද්ගලයින්ගේ සංඛ්‍යාව 1389 දක්වා ඉහළ ගොස් තිබෙනවා.

ආසාදිතයින් සංඛ්‍යාවද 63,851 දක්වා ඉහළ ගොස් ඇති බවයි නවතම විදෙස් වාර්තාවල දැක්වුණේ.

චීනයෙන් ඊයේ දිනයේදී පමණක් මරණ 121 ක් වාර්තා වී ඇති අතර, නව ආසාදිතයින් 5090 ක්ද හඳුනාගෙන තිබෙනවා.

කොරෝනා වෛරසය ආසාදනය වීමෙන් කනගාවා ප්‍රාන්තයේ 80 හැවිරිදි කාන්තාවක් මියයෑමේ පුවතක් ඊයේ ජපානයෙන් වාර්තා වූ අතර එය එරට තුළින් වාර්තා වූ ප්‍රථම කොරෝනා මරණයයි.

එය චීනයෙන් පිටත වාර්තා වූ 03 වන කොරෝනා මරණය වන අතර, මීට පෙර හොංකොං සහ පිලිපීනය රටවලින්ද කොරෝනා මරණ වාර්තා වුණා.

ලෝක සෞඛ්‍ය සංවිධානය ප්‍රකාශ කළේ චීනයෙන් කොරෝනා ආසාදිතයින් වාර්තා වීම ඉහළ අගයක් ගත්තද චීනයෙන් පිටත ආසාදිතයින් වාර්තාවීම අඩු අගයක් ගන්නා බවයි.

එමෙන්ම, චීනයේ සිට පැමිණෙන පුද්ගලයින්ට රට තුළට ඇතුළුවීම වළක්වාලමින් පනවා තිබූ තහනම තවත් සතියකින් දීර්ඝ කිරීමට  ඕස්ට්‍රේලියාව පියවර ගෙන තිබෙනවා.

මේ අතර, ඇමරිකානු රාජ්‍ය දෙපාර්තමේන්තුව ප්‍රකාශ කළේ නව කොරෝනා වෛරසය උතුරු කොරියාවේ පැතිර ඇත්ද යන්න සම්බන්ධයෙන් විමසිල්ලෙන් බලා සිටින බවයි.

චීනයට මායිම්ව පවතින උතුරු කොරියාව තුළ මෙතෙක් නව කොරෝනා වෛරසය ආසාදිත වූ පුද්ගලයෙකු වාර්තා වී නොමැති අතර, ඒ පිළිබඳව විවිධ මත පළ වනවා.