මිලිබෑන්ඞ්ගේ අවුරුදු සුබපැතුමට බ්‍රිතාන්‍යයේ සිංහල ජන කොටස්වල විරෝධය

බ්‍රිතාන්‍ය කම්කරු පක්ෂ නායක එඩ් මිලිබෑන්ඩ් සිංහල සහ දෙමළ අලූත් අවුරුදු උත්සවය නිමිත්තෙන් නිකුත් කළ සිය පණිවුඩය මගින් දෙමළ ජන කොටස පමණක් ආමන්ත්‍රණය කිරීම පිළිබඳ බ්‍රිතාන්‍යයේ සිංහල ජන කොටස දැඩි අප්‍රසාදය පළ කළා. මේ වසරේ මැයි 7 වැනිදා පැවැත්වෙන බ්‍රිතාන්‍ය මහ මැතිවරණයේදී කම්කරු පක්ෂයේ අගමැති අපේක්ෂකයා වන්නේද ඔහුයි. තම පණිවුඩය මගින් දෙමළ ජනතාවට පමණක් සුබ ප්‍රාර්ථනා කළ එඞ් මිලිබෑන්ඞ් මෙරට සිදුවූ බව කියන  යුද අපරාධ සම්බන්ධයෙන් ජාත්‍යන්තර පරීක්ෂණයක් උදෙසා තවදුරටත් කටයුතු කරන බව අවධාරණය කළා. බ්‍රිතාන්‍යයේ සිංහල ජන කොටස මෙම ප්‍රකාශයට එරෙහිව ඔහු වෙත සන්දේශයක් භාරදීමටද නියමිත බවයි ලන්ඩන් වාර්තා සඳහන් කළේ. බ්‍රිතාන්‍ය කම්කරු පක්ෂ නායක එඩ් මිලිබෑන්ඩ් තම සිංහල දෙමළ අලූත් අවුරුදු පණිවුඩය නිකුත් කළේ මෙලෙසින්.

‘‘මේ අවස්ථාව මම දෙමළ ජන කොටසට සුබ ප්‍රාර්ථනා කරන්න යොදාගන්නවා. ඔවුන් බ්‍රිතාන්‍යයේ යහ පැවැත්මට විශාල දායකත්වයක් දැක්වූ ජන කොටසක්. සියලූ අංශයන් හිදීම එම දායකත්වය දැකිය හැකියි. කම්කරු පක්ෂය දෙමළ ජනතාවගේ මිතුරෙක්. ඒ වගේම ශ්‍රී ලංකාවේ යුද්ධයේදී සිදුවූ බව කියන යුද අපරාධ සම්බන්ධයෙන් ජාත්‍යන්තර පරීක්ෂණයක් පැවැත්විය යුතුයි යන ස්ථාවරයේ අප තවදුරටත් රැදී සිටිනවා. එය කම්කරු පක්ෂයේ වගකීමක් ලෙසයි අප සළකන්නේ. දෙමළ ජනතාව සමඟ තවදුරටත් ඉදිරියේදීත් කටයුතු කිරීමටද අප සූදානම්.’’

දේශහිතෛෂී ජාතික ව්‍යාපාරයේ සභාපති ගුණදාස අමරසේකර ප්‍රකාශ කළේ බ්‍රිතාන්‍ය කම්කරු පක්ෂ අගමැති අපේක්ෂකයාගේ මෙම පියවර පිළිබඳ පුදුමයට පත් නොවිය යුතු බවයි.