හිටපු පාර්ලිමේන්තු මන්ත්‍රී සජින් වාස් රිමාන්ඩ්

ව්‍යාපාරිකයෙකුට තර්ජනය කර බලහත්කාරයෙන් කෝටි 61ක මුදලක් ලබා ගැනීමේ චෝදනා මත අත්අඩංගුවට ගත් හිටපු පාර්ලිමේන්තු මන්ත්‍රී සජින් ද වාස් ගුණවර්ධන ලබන 5 වන දා දක්වා රක්ෂිත බන්ධනාගාර ගත කෙරුණා.

ඒ, මන්ත්‍රීවරයා අපරාධ පරීක්ෂණ දෙපාර්තමේන්තුව මගින් අත්අඩංගුවට ගැනීමෙන් අනතුරුව කොළඹ ප්‍රධාන මහේස්ත්‍රාත් ගිහාන් පිලපිටිය වෙත ඉදිරිපත් කළ අවස්ථාවේදියි.

ගොඩනැගිලි සමාගමක අයිතිකරුවෙකු වන ක්‍රිෂ්ණා සෙල්වනාදන් නැමැත්තාගෙන් හිටපු මන්ත්‍රී සජින් ද වාස් ගුණවර්ධන අදාළ මුදල ලබාගෙන ඇති බවටයි චෝදනා එල්ල වන්නේ.

එමෙන්ම සැකකාර හිටපු මන්ත්‍රීවරයාට මුදල් විශුද්ධිකරණය සහ බලෙන් ලබා ගැනීම සම්බන්ධයෙන් චෝදනා එල්ල වී ඇති බව පොලිස් මාධ්‍ය ප්‍රකාශක කාර්යාලය සදහන් කළා.

අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේ මරණීය තර්ජනය කර මන්ත්‍රීවරයා අදාළ මුදල චෙක්පත් මාර්ගයෙන් ලබා ගත් බවට ඉදිරිපත් වූ පැමිණිල්ල පිළිබඳ තවදුරටත් විමර්ශන සිදුකරන බවයි.

කෙසේ වෙතත්, 2015 වසරේ සිට මේ දක්වා විධිමත් පරීක්ෂණයක් සිදුකර නොමැති බවත්, සිද්ධිය පිළිබද මේ දක්වා පැමිණිල්ලක් අපරාධ පරීක්ෂණ දෙපාර්තමේන්තුවට ලැබී නොමැති බවත්, සැකකරු වෙනුවෙන් පෙනී සිටි නීතීඥයින් අධිකරණයේදී සදහන් කළා.

කරුණු සලකා බැලූ කොළඹ ප්‍රධාන මහේස්ත්‍රාත් ගිහාන් පිලපිටිය සැකකරු රක්ෂිත බන්ධනාගාර ගත කිරීමට නියෝග කළ අතර එදිනට අදාළ ව්‍යාපාරිකයාට අධිකරණයේ පෙනී සිටින ලෙසයි දැනුම් දුන්නේ.