චීන තානාපති මහින්ද හමුවේ

හිටපු ජනාධිපති මහින්ද රාජපක්ෂ අද ශ්‍රී ලංකාවේ චීන තානාපති යී - ෂියැංලියැං හමුවී තිබෙනවා.  

කොළඹ පිහිටි හිටපු ජනාධීපතිවරයාගේ නිල නිවසේදී සිදුවූ මෙම සාකච්ඡාවේදී හම්බන්තොට සිද්ධිය පිළිබඳව අවධානය යොමුවූ බවයි වාර්තාවන්නේ.

මේ අතර හම්බන්තොට වරාය සහ කර්මාන්තපුරය පිළිබඳ කටයුතු ප්‍රදේශවාසී උද්ඝෝෂකයන්ට බැටන් පොලූ පහරදී හිර කූඩුවට දමා විසඳිය හැකි ප්‍රශ්නයක් නොවන බව හිටපු ජනාධිපති මහින්ද රාජපක්ෂ පවසනවා.

ඒ, හම්බන්තොට වරාය ගණුදෙනුව යන මැයෙන් නිවේදනයක් නිකුත් කරමින්.

අදාළ ගණුදෙනුවෙන් ශ්‍රී ලංකාවට සිදුවන ආර්ථිකමය වාසි අවාසි, වරාය පරිශ්‍රයේ පාලනය, රටේ ස්වාධිපත්‍යය සහ පරිසරයට ඇතිවිය හැකි බලපෑම් සම්බන්ධයෙන් ගැටළු පවතින බවයි ඔහු එමඟින් වැඩිදුරටත් ප්‍රකාශ කරන්නේ.

පසුගිය ආණ්ඩුව චයිනා හාබර් සහ චයිනා මර්චන්ට් සමාගම් දෙක සමඟ වසර 40 කට අදාළ කළමනාකරන ගිවිසුමක් අත්සන් කළ බව සඳහන් කරන හිටපු ජනාධිපතිවරයා යෝජිත 99 අවුරුදු නව ගිවිසුම් මගින් ආර්ථිකමය අවාසි රැසක් සිදුවන බව සඳහන් කරනවා.

මීට පෙර අත්සන් කළ ගිවිසුම නොසළකා හැරීම මෙන්ම කොළඹ වරායේ නැගෙනහිර පර්යන්තයේ සංවර්ධන ව්‍යාපෘති නවතා දැමීමද බුද්ධිමත් නොවන ක්‍රියාමාර්ග ලෙසයි ඔහු හඳුන්වාදෙන්නේ.

එසේම හම්බන්තොට වරාය බදු දීමේදී හෙක්ටයාර 2000 ක් පුරා විහිදී ඇති කර්මාන්ත කලාපයේ බලයද විදේශීය සමාගමකට ලැබෙන නිසා එය රටේ ස්වාධිපත්‍යයටද බලපෑම් ඇති කරන බව හිටපු ජනාධිපති මහින්ද රාජපක්ෂගේ අදහසයි.

වසර 99 ක් වැනි දිගු කළකට වරාය බදුදීම පිළිබඳව තමන් විරුද්ධත්වය පළ කරන බව සඳහන් කරන ඔහු අක්කර 15000 ක ආයෝජන කලාපයක් විදෙස් සමාගමකට ලබාදීම සාධාරණීකරණය කළ නොහැකි බවට ප්‍රකාශ කරනවා.