හයිබ්‍රිඩ් වාහනවල ලීසිං පහසුකම 50% සිට 70% දක්වා ඉහළට

හයිබ්‍රිඩ් වාහන මිලදී ගැනීමේදී වටිනාකමින් සියයට 50 ක් ලෙසට පැවති ලීසිං පහසුකම සියයට 70 ක් දක්වා ඉහළ නංවා තිබෙනවා.

මුදල් අමාත්‍ය මංගල සමරවීරයි මේබව කියාසිටියේ.

මේ අතර ලියාපදිංචි නොකළ විද්‍යුත් මෝටර් රථ සඳහා ලබාදුන් බදු සහනය ලියාපදිංචි කළ මෝටර් රථ සඳහා ද ලබා දීමට රජයේ අවධානය යොමුව තිබෙනවා.

ඒ අනුව මෝටර් රථයක් නිෂ්පාදිත දිනයේ සිට වසරක කාලයක් සඳහා මෙම සහනය ලබා දීමට මුදල් අමාත්‍යවරයාගේ අවධානය යොමුව ඇති බව මුදල් අමාත්‍යාංශයේ නියෝජ්‍ය ලේකම් එස්. ආර්. ආටිගල මහතා සඳහන් කළා.

මුදල් අමාත්‍ය මංගල සමරවීර මහතා 2018 අයවැය ඉදිරිපත් කරමින්, ලියාපදිංචි නොකළ විද්‍යුත් මෝටර් රථ සඳහාවන ආනයනික බදු රුපියල් ලක්ෂ 10කින් පහල දමන බව සඳහන් කළා.

ඒ අනුව එන්ජින් ධාරිතාව කිලෝ වොට් 50 සිට 100 දක්වා වන මෝටර් රථ සඳහා කිලෝවොට් 1කට පැවැති බද්ද රුපියල් 25,000 සිට රුපියල් 12,500 දක්වා සහ කිලෝ වොට් 100 සිට 200 දක්වා වන මෝටර් රථ සඳහා කිලෝවොට් 1කට පැවැති බද්ද රුපියල් 40,000 සිට රුපියල් 25,000 දක්වා පහල දමා තිබෙනවා.

ඒ අනුව කිලෝවොට් 80 වර්ගයේ මෝටර් රථයක් රුපියල් ලක්ෂ 10කින් පමණ පහල ගිය ද වාහන ආනයනකරුවන් පැවසුවේ ලියාපදිංචි නොකළ වාහන මෙරටට ගෙනඒමේ හැකියාවක් නොමැති බැවින් එම සහනය ජනතාවට හිමි නොවන බවයි.

ඒ හේතුවෙන් ලියාපදිංචි කළ මෝටර් රථ සඳහා ද මෙම සහනය ලබා දෙන ලෙස ඔවුන් ඉල්ලීමක් කළා.

ඒ සම්බන්ධයෙන් අවධානය යොමුකළ මුදල් අමාත්‍යාංශය, ලියාපදිංචි කළ විද්‍යුත් මෝටර් රථ සඳහා ද මෙම සහනය ලබා දීමට තීරණය කර තිබෙනවා.

මහාභාණ්ඩාගාර නියෝජ්‍ය ලේකම් එස්.ආර්. ආටිගල මහතා පැවසුවේ මොටර් රථයක් නිෂ්පාදනය කළ දිනයේ සිට වසරක කාලයක් දක්වා මෙම සහනය ලබා දීමට මුදල් අමාත්‍යවරයාගේ අවධානය යොමුව ඇති බවයි.

කෙසේ වෙතත් ඒ.එම්. ඩබ්ලිව්. ආයතනයේ නිසාන් වාහන අංශයේ නියෝජ්‍ය සාමාන්‍යාධිකාරී ප්‍රදීප් විජේරත්න මහතා පවසන්නේ මෙම ක්‍රමය යටතේ ගෙන්වීමට සිදුවන මෝටර් රථයේ කිලෝවොට් ප්‍රමාණය ඉහල බැවින් ඒ සඳහා අධික පිරිවැයක් දැරීමට ජනතාවට සිදුවන බවයි.