තරුණයින් දෙදෙනෙකුගේ ජීවිත බිළි ගත් මාරක අනතුර

යාපනය -මහනුවර ඒ-9 මාර්ගයේ අලිමංකඩ ප්‍රදේශයේදී ඊයේ (18)  රාත්‍රීයේ යතුරු පැදි දෙකක් එකිනෙක මුහුණට මුහුණ ගැටීමෙන් තරුණයින් දෙදෙනෙකු මරුමුවට පත්වී තවත් තරුණයින් දෙදෙනෙකු බරපතල තුවාල ලබා තිබෙනවා.

මෙම අනතුර සිදුව ඇත්තේ රාත්‍රී 7.40 ට පමණ බවයි පොලිසිය පවසන්නේ.

මෙම සිද්ධියෙන් මියගොස් ඇත්තේ යාපනය කරවෙඩ්ඩි ප්‍රදේශයේ වයස අවුරුදු 27 ක තරුණයෙකු හා කිළිනොච්චියේ වයස අවුරුදු 22 ක තරුණයෙකු බවයි වාර්තාවන්නේ.

ඔවුන් යතුරු පැදි දෙක පදවාගෙන ගිය තරුණයින් දෙදෙනා බවයි පොලිසිය පවසන්නේ.

යතුරු පැදි දෙකේ පිටුපස සිටි තරුණයින් දෙදෙනා බරපතල තුවාල ලබා කිළිනොච්චිය රෝහලට ඇතුළත් කර තිබෙනවා.

කිළිනොච්චිය පොලීසිය සිද්ධිය පිළිබද වැඩිදුර පරීක්ෂණ පවත්වනවා.