සාම්පූර් සුඩකුඩා දාගැබ ඩෝසර් කළ පුද්ගලයන් හඳුනාගැනේ

ත්‍රිකුණාමලය සාම්පූර් ප්‍රදේශයේ පිහිටි සුඩකුඩා දාගැබ විනාශ කළ පුද්ගලයින් හදුනාගෙන ඇති බව කතානායක කරූ ජයසූරිය ප්‍රකාශ කළා.

ඔහු මේ බව කියා සිටියේ බණ්ඩාරනායක සම්මන්ත්‍රණ ශාලාවේ පැවති අමරපුර සිරි සද්ධර්මවංශ මහානිකායේ අනුනායක ධුරයට පත් කළ ආචාර්ය පූජ්‍ය දිමියාවේ අමරවංශ හිමියන්ට අක්තපත්‍ර ප්‍රදානය කිරීමේ උත්සවයකට ඊයේ එක්වෙමින්.

එම අවස්ථාවට පූජ්‍ය මහාචාර්ය බෙල්ලන්විල විමලරතන නාහිමියන් ද එක්ව සිටියා.

මෙම දාගැබ පුරාවිද්‍යා දෙපාර්තමේන්තුව විසින් හදුනාගෙන එහි ගවේෂණ කටයුතු ආරම්භ කිරීම සදහා දින නියම කර තිබුණා.

එලෙස තිබියදී කිසියම් පිරිසක් විසින් පසුගියදා මෙම දාගැබ පිහිටි භූමිය සම්පූර්ණයෙන්ම ඩෝසර් කර විනාශයට පත් කර තිබුණා.

ඒ පිළිබදව මහාචාර්ය බෙල්ලන්විල විමලරතන හිමියන් අදහස් පළ කරමින් කියා සිටියේ

 ‘‘ අද වෙනතුරු මම දැක්කේ නෑ එක මැති ඇමතිතුමෙක් මේ ගැන කතා කරනවා තියෙනවයි කියලා. ඇයි මොකටද මේවා ඩෝසර් කරන්නේ. කවුද මේවා ඩෝසර් කරන්නේ. මේ රටේ බෞද්ධ උරුමය වළලලා දාන්න. මෙතන හාමුදරුවරු කතා කරන්නේ නැත්නම් බුද්ධ ශාසන ඇමතිතුමෙක් කවුද කතා කරන්නේ. කතා කරන්නේ නෑ. එක එක කයි කතන්දර කියලා මේවා වහන්න වෙන්නේ නෑ ’’

ඉන් අනතුරුව අදහස් දැක්වූ කතානායක කරූ ජයසූරිය කියා සිටියේ අදාළ සිදුවීම සම්බන්ධයෙන් පොලිසිය සහ අදාළ අංශ සමග සාකච්ඡා කළ බවයි.

එහිදී පොලීසිය විසින් ඊට අදාළ පුද්ගලයින් හඳුනාගෙන ඇති බව සඳහන් කළ බවද කථානායකවරයා එහිදී කියා සිටියා.