අතුරුදහන් වූ තරුණිය මිදුලට ආවේ කොහොමද ?

කොල්ලුපිටිය පිහිටි පුද්ගලික තොරතුරු තාක්ෂණික ආයතනක ඉගෙණුම ලබමින් සිටියදී පසුගිය 12 වැනිදා අතුරුදහන්වූ ශිෂ්‍යාවක් 14 වැනිදා රාත්‍රීයේ දංකොටුවේ පිහිටි තම නිවස ඉදිරිපිට මිදුලේ වැටී සිටියදී හමුවී ඇති බව දංකොටුව පොලීසිය කියයි.
මෙසේ හමුවී ඇත්තේ දංකොටුව - ඇටියාවල,කැරන් වත්ත පදිංකාරියක් වන කැකුළිගේ ජීවා කුමාරි සිල්වා (අවු:23) නම්වූ ශිෂ්‍යාවක්ය.
කොල්ලුපිටියේ පිහිටි පුද්ගලික තොරතුරු තාක්ෂණික ආයතනයක මෙම ශිෂ්‍යාව ඉගෙණුම ලබමින් සිට ඇත.කොළඹ 7 රොස්මිඩ් පෙදෙසේ පදිංචිව සිටි තම සහෝදරියගේ නිවසේ සිට ඇය එම පාඨමාලාව හැදෑරීම සදහා ගොස් ඇත. එම අයතනය පිහිටි ගොඩනැගිල්ලේ 15 වැනි තට්ටුවේදී සිසු සිසුවියන් පිරිසක් අතර පසුගිය 12 වැනිදා දහවල් 2.20 ට පමණ කිසියක් සිදුවීමක් සිදුවී ඇත.එම අවස්ථාවේ සිට මෙම සිසුවිය අතුරුදහන්වී සිට ඇත.සිසුවියගේ දෙමව්පියන් විසින් මේ බව කොල්ලුපිටිය පොලීසියට පැමිණිල්ලක් කරමින් දැණුම් දී ඇත.
14 වැනිදා රාත්‍රී 10.00 ට පමණ තම මිදුලේ දියණිය වැටී සිටිනු දුටු බවත් කිසියම් රෝගී තත්ත්වයකින් ඇය පසුවන බැවින් ඇයව වහාම මීගමුව මහා රෝහලට ඇතුළත් කළ බවත් ශිෂ්‍යාවගේ දෙමව්පියන් මීගමුව රෝහල් පොලීසියට පවසා ඇත.රෝහල් ගත කර ඇති තරුණියගෙන් මෙතෙක් ප්‍රකාශයක් ලබා ගෙන නොමැති බව රෝහල් පොලීසිය සදහන් කරයි.
මෙම තරුණියව කිසියම් පිරිසක් විසින් පැහැර ගෙන ගොස් සඟවා තබා ගෙන සිට මේ ආකාරයට ගෙනවිත් දැමුවාද? මෙහි කිසියම් අපරාධය් සිදුවී ඇද්ද යන්න සම්බන්ධයෙන් පරීක්ෂණ ආරම්භ කර ඇති බව දංකොටුව පොලීසිය කියයි.කෙසේ වෙතත් මේ සම්බන්ධයෙන් දංකොටුව පොලීසිය විසින් කොල්ලුපිටිය පොලීසියටද දැණුම් දී ඇත.
වැඩිදුර පරීක්ෂණ පැවැත්වේ.