විදුලිය බිඳ වැටීමට හේතුව හෙළි වෙයි

දිවයින පුරා සිදුවු විදුලි බිඳ වැටීමට හේතුව පොල්පිටිය සිට කොළොන්නාව දක්වා එන සම්ප්‍රේෂණ මාර්ගයට අකුණක් වැදීම හේතුවෙන් සිදුවන්නට ඇතැයි ලංකා විදුලිබල මණ්ඩලය සැක පළකරනවා.

මණ්ඩලයේ සභාපති අනුර විජේපාල මහතා සඳහන් කලේ අකුණ වැදීම හේතුවෙන් සමස්ත විදුලිබල පද්ධතිය අසමතුලිත වීම හමුවේ මෙම තත්වය උද්ගත වන්නට ඇති බවයි.

මේ අතර මෙම හදිසි විදුලි බිඳ වැටීම පිළිබඳ වාර්තාවක් සපයන්නැයි විෂය භාර අමාත්‍ය රංජිත් සියඹලාපිටිය මහතා විදුලිබල මණ්ඩලයට නියෝග කර තිබෙනවා.

කෙසේවෙතත් මේවන විට හදිසි බිඳ වැටීමක් හේතුවෙන් ඇණ හිට විදුලි සැපයුම යථා තත්ත්වයට පත්වෙමින් තිබෙනවා.

ලංකා විදුලිබල මණ්ඩලය සඳහන් කළේ කොළඹ අවට ප්‍රදේශ කිහිපයක විදුලි සැපයුම යථා තත්ත්වයට පත්කර ඇති බවයි.

සවස 06 වනවිට විදුලි සැපයුම සම්පූර්ණ කිරීමට හැකිවනු ඇති බවටයි එම මණ්ඩලය විශ්වාසය පළ කළේ.

මේ අතර, හදිසි බිඳ වැටීමත් සමඟ කොළඹ නගරයේ විදුලි ආලෝක සංඥා පද්ධතිය අක්‍රියවීමක් සිදුවුණා.

පොලිසිය සඳහන් කළේ ඒ හේතුවෙන් කොළඹ අවට මාර්ග රැසක වාහන තදබදයක්ද හටගත් බවයි.