යතුරුපැදිකරුවන් 4 දෙනෙකුට දිවි අහිමි වෙයි

ප්‍රදේශ කිහිපයක සිදුවු අනතුරුවලින් යතුරුපැදිවල ගමන් කළ තරුණයන් 4 දෙනෙකු මියගොස් තිබෙනවා.

ඊයේ රාත්‍රී 9.50 ට පමණ එක් අනතුරක් සිදුව ඇත්තේ හොරණ වගවත්ත පාලම අසලදීයි.

පානදුර සිට රත්නපුර දෙසට ගමන් කළ මෝටර් රථයක යතුරුපැදියක් ගැටීමෙන් එම අනතුර සිදුව ඇති බවයි පොලිසිය සඳහන් කළේ.

එම අනතුරින් හඳපාන්ගොඩ අරකාවිල ප්‍රදේශයේ පදිංචි වයස අවුරුදු 19 ක් සහ 20 ක් වු තරුණයෙන් දෙදෙනෙක් මරණයට පත්වුනා.

මෝටර් රථයේ රියදුරා පොලිස් අත්අඩංගුවට ගෙන තිබෙනවා.

මේ අතර ඊයේ පස්වරු 4.45 ට පමණ වැලිගම පංචාලිය මාර්ගයේ සිදුවු යතුරුපැදි අනතුරකින් 16 හැවිරිදි ළමයෙක් මරණයට පත්ව ඇති බවයි පොලිසිය කියාසිටියේ.

පංචාලිය දෙසට ධාවනය වු යතුරුපැදිය පැදිකරුට පාලනය කර ගැනීමට නොහැකිව මාර්ගයෙන් ඉවතට පැන ගසක ගැටීමෙනුයි අනතුර සිදුව ඇත්තේ.

බරපතල තුවාල ලැබු යතුරුපැදිකරු අහංගම රෝහලට ඇතුලත් කිරීමෙන් පසු මරණයට පත්ව තිබෙනවා.

ඔහු වැලිගම ඉබ්බාවල ප්‍රදේශයේ පදිංචිකරුවෙක්.

මේ අතර ඉංගිරිය පොලිසිය ආසන්නයේදී සිදුවු යතුරුපැදි අනතුරකින් ද 24 හැවිරිදි තරුණයෙක් මරණයට පත්ව තිබෙනවා.

ඊයේ රාත්‍රී 7.45ට පමණ රත්නපුර දෙසට ධාවනය වු යතුරුපැදියක් ලොරියක් පසුකර යාමට උත්සාහ කිරීමේදී ඉදිරියෙන් පැමිණි මෝටර් රථයක ගැටීමෙනුයි අනතුර සිදුවී ඇත්තේ.

මියගොස් ඇත්තේ කෑගල්ල මොරගොඩ ප්‍රදේශයේ පදිංචි 24 හැවිරිදි තරුණයෙක්.

මෝටර් රථයේ රියදුරා පොලිස් අත්අඩංගුවට ගෙන තිබෙනවා.