අවසන් කටයුතු අතරතුර පොලිසිය දේහයක් රැගෙන යයි

මියගිය කාන්තාවකගේ දේහය පිළිබද අවසන් කටයුතු සිදුකිරීම සදහා පාංශුකුලය ලබාදෙන අවස්ථාවේදී එම ස්ථානයට පොලිසිය පැමිණ දේහය රැගෙන යාමේ පුවතක් ගලේවෙල - බෙලිගමුව - ලියනපොත ප්‍රදේශයෙන් අද (04) වාර්තා වුණා.

ඒ පශ්චාත් මරණ පරීක්ෂණය පැවැත්වීම සදහායි.

85 හැවිරිදි මෙම කාන්තාව පසුගිය පෙබරවාරි මස 9 වනදා දඹුල්ල - කුරුණෑගල ප්‍රධාන මාර්ගයේදී වෑන් රථයක ගැටී බරපතල තුවාල ලබා දින 84 කට ආසන්න කාලයක් රෝහල් ගතව ප්‍රතිකාර ලබා තිබෙනවා.

අප්‍රේල් මාසය අවසානයේ නිවසට පැමිණි ඇය පසුගිය පළවනදා හදිසියේ මියගියා.

ප්‍රදේශයේ ග්‍රාම නිලධාරිවරයා දැනුවත් කළ පවුලේ ඥාතීන් දේහය මිහිදන් කිරීමට සූදානම් කර ඇති අතර, එම අවස්ථාවේදීයි අධිකරණ නියෝගයක් ලබා ගත් පොලිසිය පශ්චාත් මරණ පරීක්ෂණය පැවැත්වීම සදහා දේහය දඹුල්ල රෝහලට රැගෙන ගොස් ඇත්තේ.