හිටපු නි.ඇමති සරත් කුමාරට අධි චෝදනා

හිටපු නියෝජ්‍ය අමාත්‍ය සරත් කුමාර ගුණරත්න ඇතුළු 06 දෙනෙකුට කොළඹ මහාධිකරණය හමුවේ අධිචෝදනා භාර දී ඇප මත මුදා හැර තිබෙනවා.

ඒ මීගමුව කලපු සංවර්ධන ව්‍යාපෘතියට වෙන්කළ රුපියල් මිලියන 14කට අධික මුදලක් පසුගිය ජනාධිපතිවරණ සමයේදී දේශපාලන කටයුතුවලට යොදා ගැනීම ඇතුළු අධි චෝදනා 06ක් යටතේ ගොනු කර තිබූ නඩුව කොළඹ මහාධිකරණ විනිසුරු ආර්. ගුරුසිංහ හමුවේ අද (25) කැඳවූ අවස්ථාවේදීයි.

අධි චෝදනා බාර දීමෙන් පසුව එක් විත්තිකරුවෙකු රුපියල් 25,000ක බැගින් වූ මුදල් ඇප සහ රුපියල් ලක්ෂ 05 බැගින් වූ ශරීර ඇප 02ක් මත මුදා හැරීමටයි මහාධිකරණ විනිසුුරුවරයා නියෝග කළේ.

හිටපු නියෝජ්‍ය අමාත්‍ය සරත් කුමාර ගුණරත්නට අමතරව ශ්‍රී ලංකා ධීවර වරාය නීතිගත සංස්ථාවේ හිටපු සභාපති පියල් අබේසේකර සහ ජාතික ලොතරැයි මණ්ඩලයේ හිටපු සභාපති උපාලි ලියනගේ ද මෙලෙස අධි චෝදනා ලැබූ පිරිසට අයත්.

මෙම නඩුව මැයි මස 04 වනදා යළි කැඳවනු ඇති.