මහරගම සභාපතිගේ සර් දැන්වීමට, එජාපයේ සහ ජවිපෙ විරෝධය

මහරගම නගර සභාවේ සභාපති ටිරාජ් ලක්රුවන් විසින් පළ කර ඇතැයි කියන දැන්වීමක් සම්බන්ධයෙන් එහි මන්ත්‍රීවරුන් දැඩි විරෝධය පළ කරනවා.

නගරයේ පළමු පුරවැසියා සහ ආයතනයේ ප්‍රධාන විධායක තනතුර හොබවන පුද්ගලයා තමන් නිසාවෙන් සියලූම නාගරික මන්ත්‍රීවරුන්, නිලධාරීන් සහ ජනතාව ‘‘සර්’’ යන නාමයෙන් තමන්ට ආමන්ත්‍රණය කළ යුතු බවට ඔහුගේ නිල කාමරයට ඇතුලූවන දොරටුවෙහි දැන්වීමක් පළ කර තිබුණා.

මීට මාස එකහමාරකට පමණ පෙර අදාළ දැන්වීම පළ කර තිබූ නමුත් එය මේ වනවිට ඉවත් කර ඇති බවටයි වාර්තා වන්නේ.

අදාළ දැන්වීම සම්බන්ධයෙන් මේ වනවිට සමාජ මාධ්‍ය ඔස්සේද දැඩි කථාබහක් ඇතිව තිබෙනවා.

ඉකුත් පළාත් පාලන ඡන්ද විමසීමේදී මහරගම නගර සභාවේ බලය හිමිවූයේ බයිසිකලය ලකුණෙන් තරඟ වැදුනු ස්වාධීන අංක දෙක කණ්ඩායමටයි.

ඒ අනුවයි සභාවේ සභාපතිවරයා ලෙස ටිරාජ් ලක්රුවන් පත්වූයේ.

කෙසේ වෙතත් ඔහු සභාපති තනතුරට සුදුසු නොවන බවත්, සභාපතිවරයාගේ ක්‍රියාකලාපයට දැඩි විරෝධය පළ කරන බවත් ජනතා විමුක්ති පෙරමුණේ නාගරික මන්ත්‍රී දේවානන්ද සුරවීර සහ එක්සත් ජාතික පක්ෂ මන්ත්‍රී රුවන් ජයසිංහ හිරු ප්‍රවෘත්ති අංශයට සඳහන් කළේ.

අදාළ දැන්වීම සම්බන්ධයෙන් හිරු ප්‍රවෘත්ති අංශය නගර සභාවේ සභාපති ටිරාජ් ලක්රුවන්ගෙන් විමසීමට උත්සහ කළද එය ව්‍යර්ථ වූයේ ඔහුගේ ජංගම දුරකථනය ක්‍රියාවිරහිත කර තිබීම හේතුවෙන්.

මේ අතර කිසියම් පුද්ගලයෙකු සභාපතිවරයා සමග දුරකථන සංවාදයක නිරතවන ආකාරය දැක්වෙන වීඩියෝවක් සමාජජාල මාධ්‍ය වෙත නිකුත් කර තිබෙනවා.