පුත්‍රයාත් රෙජිස්ට්‍රාර් කරන - 500ක් ඉල්ලන රෙජිස්ට්‍රාර් නෝනා - හිරු CIA

උපතක් හෝ මරණයක් ලියාපදිංචි කිරීමේදී නිකුත් කරනා මුල් සහතිකය රෙජිස්ට්‍රාර් ජනරාල් දෙපාර්තමේන්තුව මගින් ලබා දෙන්නේ නොමිලේ සිදුකරනා සේවාවක් ලෙසයි. එවැනි මුල් ලියාපදිංචියක් සඳහා මුදල් අය කිරීම සපුරා තහනම්.

යම් හෙයකින් රෙජිස්ට්‍රාර්වරයෙකු එවැනි සහතිකයක් නිකුත් කිරීම සදහා මුදල් ලබා ගන්නේ නම් එය සැලකෙන්නේ අල්ලස් ලබා ගැනීමක් ලෙසයි.
අද සී.අයි.ඒ. වෙන්වන්නේ එවැනි මුල් ලියාපදිංචි සහතික සදහා රුපියල් 500 බැගින් අල්ලස් ලබා ගන්නා මහාපරිමාණ වංචාවක් හෙළි කිරීම සඳහායි.

මහියංගන ප්‍රාදේශීය ලේකම් බල ප්‍රදේශයේ උපත් හා මරණ රෙජිස්ට්‍රාර්වරියගේ නිවස පිහිටා ඇත්තේ මහියංගනය පූජා නගරය ආසන්නයේ.
දිනපතා අලුයම හතරේ පමණ සිට ජනතාව  රෙජිස්ට්‍රාර්වරියගේ නිවස අසළ පෙළ ගැසී සිටින්නේ උදෑසන 10 ට ඇය සිය රාජකාරී ආරම්භ කරනා තුරුයි.
 
අලුත උපන් තම කිරිකැටියන් දෑත දරා මව්පියන් අසීරුවෙන් රැදී සිටින්නේ උප්පැන්න සහතිකය ලබාගෙන තම ගම්බිම් කරා යෑම සඳහායි.
 
උදෑසන 10 ට රෙජිස්ට්‍රාර්වරියගේ නිවසට ප්‍රවේශ වුවද තවත් පැය භාගයකට ආසන්න කාලයක් ඔවුන්ට එහි ගත කිරීමට සිදුවන බව අපකළ නිරීක්ෂණයේදී දක්නට ලැබුණා.
 
දිනපතා පැමිණෙන මුල් උප්පැන්න ලියාපදිංචි අයදුම් පත්‍රය මෙම ස්ථානයේදී සම්පූර්ණ කරනා රෙජිස්ට්‍රාර්වරිය අත්සන් කිරීමට බව පවසා නිවස තුළට පුද්ගලයන් රැගෙන යන අයුරු අප කැමරා කාචයේ සටහන් වුණා.

ඇය ගිය පසු රෙජිස්ට්‍රාර් ලෙස පෙනී සිටින්නේ ඇයගේ පුත්‍රයායි.
 
නිවස තුළදී උප්පැන්න සහතිකය නිකුත් කිරීමට රෙජිස්ට්‍රාර්වරිය රුපියල් 500 ක අල්ලසක් ඉල්ලා සිටිනවා.

මහියංගනය ප්‍රාදේශීය ලේකම් කාර්යාල වාර්තා අනුව දළ  වශයෙන් මසකට මේ ප්‍රදේශයේ උපත් 350 ක් පමණත් මරණ 40 ක් පමණත් වාර්තාවනවා.
 
ඒ අනුව
උප්පැන්න සහතික නිකුත් කිරීම මගින් රෙජිස්ට්‍රාර්වරිය මසකට උපයා ගන්නා අල්ලස් මුදල රුපියල් 175000 ක්.
මරණ සහතික නිකුත් කිරීම හරහා උපයා ගන්නා අල්ලස් මුදල 20000 ක්.

ඒ අනුව  මාසිකව රුපියල් 195000කට ආසන්න මුදලක් මැය නීති විරෝධීව උපයා ගන්නවා.

හිරු සී.අයි.ඒ. කණ්ඩායම මෙම රෙජිස්ට්‍රාර්වරියගේ අල්ලස් ලබා ගැනීම පිළිබදව තවත් තොරතුරු රැසක් හෙළි කරගෙන අවසන්.