වාරියපොලින් පැහැරගත් තරුණයා මුදාගැනේ - කප්පම්කරුවන් දෙදෙනෙකු දැලේ

රුපියල් දෙකෝටියක කප්පම් මුදලක් ඉල්ලා වාරියපොලදී පැහැරගත් තරුණයා අද නිකවැරටිය ප්‍රදේශයේදී හමුවුණා.

ඔහු මේ වනවිට ප්‍රතිකාර සඳහා කුරුණෑගල රෝහලට ඇතුළත් කර ඇති බවයි පොලීසිය පවසන්නේ.

වාරියපොල පදිංචි 20 හැවිරිදි මෙම තරුණයා පැහැරගනු ලැබුවේ පසුගිය 12 වනදා රාත්‍රියේදියි.

සිය පියාට හිමි ව්‍යාපාරික ස්ථානයේ සිට පාපැදියකින් නිවස බලා යමින් සිටියදී සුදු පැහැති හයිබ්‍රිඩ් වර්ගයේ මෝටර් රථයකින් පැමිණි පිරිසක් පැහැරගැනීම සිදුකර තිබුණා.
 
පසුව පැහැරගැනීම සිදුකළ පුද්ගලයන් දුරකථනය ඔස්සේ තරුණයාගේ පියා අමතා පවසා ඇත්තේ රුපියල් කෝටි 2 ක මුදලක් ලබාදීමට එකඟ වුවහොත් තරුණයා මුදාහැරීමට කටයුතු කරන බවයි.

මේ පිළිබඳව වාරියපොල පොලීිසියට ලැබුණු පැමිණිල්ලකට අනුව පුළුල් පරීක්ෂණයක් ආරම්භ කෙරුණා.
 
පොලීසියේ උපදෙසා මත තරුණයාගේ ඥාතීන් මුදල් ලබාදීමට එකඟ වී ඇති අතර, පැහැරගත් කල්ලියට ඒ පිළිබඳව දැනුම්දී තිබෙනවා.

එහිදී පැහැරගැනීම සිදුකළ පිරිස අවස්ථා කිහිපයකදී කුරුණෑගල දිස්ත්‍රික්කයේ විවිධ ස්ථානවලට පැමිණෙන ලෙස දැනුම්දී ඇති බවත් ඒ සෑම අවස්ථාවකදීම කප්පම් කල්ලියේ පුද්ගලයන් තරුණයාගේ ඥාතීන් මගහැර ගොස් ඇති බවත් වාර්තාවනවා.
 
මේ අතර වාරියපොල ප්‍රදේශයේ හයිබ්‍රිඞ් මෝටර් රථයක හිමිකරුවෙකු පොලීසියෙන් අත්අඩංගුවට ගත්තේ උපාය දුතයෙකු ලබාදුන් තොරතුරකට අනුවයි.

ඔහුගෙන් ප්‍රශ්න කිරීමේදී පැහැරගැනීමට සම්බන්ධ පුද්ගලයන් හයදෙනෙකු පිළිබඳ තොරතුරු අනාවරණ කරගෙන තිබෙනවා.

ඒ අනුව පොලීසියෙන් ඊයේ දහවල් තවත් පුද්ගලයෙකු අත්අඩංගුවට ගත්තා.
 
ඊයේ පස්වරුවේ පැහැරගැනීම සිදුකළ පුද්ගලයන් තරුණයාගේ ඥාතීන්ට ඇමතුමක් ලබාදී පවසා ඇත්තේ මහව ප්‍රදේශයේ ස්ථානයකට පැමිණෙන ලෙසයි.

එම ස්ථානයට සිවිල් පොලිස් නිලධාරීන් සමඟ පවුලේ ඥාතීන් ගොස් ඇති අතර, එහිදීද කප්පම්කරුවන් මගහැර ගොස් තිබෙනවා.
 
අද අලූයම පොලීසියට නිර්නාමික  දුරකථන ඇමතුමක් ඔස්සේ පවසා ඇත්තේ පැහැරගත් තරුණයා නිකවැරටිය නගරයේ පිහිටි ඔරලෝසු කණුව ආසන්නයේ දමා යන බවටයි.

ඒ අනුව අද අලූයම 5.30 ට පමණ පොලිස් නිලධාරීන් එම ස්ථානයට ගොස් තරුණයා සිය භාරයට ගෙන තිබෙනවා.
 
පැහැරගත් තරුණයා මහව ප්‍රදේශයේ අතහැර දැමූ නිවසක රඳවාගෙන  සිට ඇති අතර, දින කිහිපයක් තිස්සේ ඔහුට විවිධ අඩන්තේට්ටම් සිදුකර ඇති බව  අනාවරණ වී තිබෙනවා.

තරුණයාගේ මුඛය ප්‍රදේශයේ තැලීම් කිහිපයක් දක්නට ලැබෙන බවද සඳහන්.

ඒ අනුවයි ඔහු ප්‍රතිකාර සඳහා නිකවැරටිය රෝහල වෙත යොමු කිරීමෙන් පසුව කුරුණෑගල රෝහල වෙත මාරුකර යවා ඇත්තේ.

කප්පම් සිද්ධියට සම්බන්ධ අනෙක් සැකකරුවන් සිව්දෙනා අත්අඩංගුවට ගැනීමට මේ වනවිටත් විශේෂ පොලිස් කණ්ඩායමක් පරීක්ෂණ ආරම්භ කර තිබෙනවා.