හෙට වර්ජනය ගැන වෛද්‍යවරුන් දෙකඩ බෙදේ

පශ්චාත් සීමාවාසික වෛද්‍යවරුන්ගේ පත්වීම් ලැයිස්තුවට සෞඛ්‍ය අමාත්‍යවරයා අත්තනෝමතික ලෙස බලපෑම් සිදුකිරීමට විරෝධය පළ කරමින් හෙට පෙරවරු 8 සිට 12 දක්වා දිවයින පුරා වෛද්‍යවරුන් සංකේත වර්ජනයක නිරත වන බව රජයේ වෛද්‍ය නිලධාරින්ගේ සංගමය ප්‍රකාශ කළා.

මෙම වර්ජනය ආපදාවට ලක්වූ කොළඹ, ගම්පහ සහ කෑගල්ල දිස්ත්‍රික්ක වල ක්‍රියාත්මක කිරීමට සංගමයේ විධායක සභාව තීරණය කළ බවයි එමගින් නිකුත් කළ නිවේදනයේ දැක්වෙන්නේ.

වර්ජනය පවතින කාලය තුළ  වුව ද හදිසි ප්‍රතිකාර සේවා සහ ආපදා සහන සේවා කිසිදු බාධාවකින් තොරව පවත්වාගෙන යාමට වෛද්‍යවරුන් දායක වන බවත් එහි සදහන්.

මාතෘ රෝහල්, ළමා රෝහල් , පිළිකා ආයතන හා වකුගඩු ප්‍රතිකාර ආයතන ද සාමාන්‍ය පරිදි ක්‍රියාත්මක වන බව ද රජයේ වෛද්‍ය නිලධාරින්ගේ සංගමය අවධාරණය කළා.

කොළඹ අද පැවති මාධ්‍ය හමුවකට එක්වෙමින් රජයේ වෛද්‍ය නිලධාරින්ගේ සංගමයේ මාධ්‍ය ප්‍රකාශක වෛද්‍ය නවීන් ද සොයිසා කියා සිටියේ අවසන් මොහොතේ හෝ සාකච්ඡාමය විසදුමකට තමන් සූදානම් බවයි.

මේ අතර, රජයේ වෛද්‍යවරුන් නියෝජනය කරන බහුවිධ අංශයන්හි නිපුණතා පූර්ණ වෛද්‍ය නිලධාරි සංගමය අද තවත් මාධ්‍ය සාකච්ඡාවක් පවත්වමින් වෛද්‍ය වැඩවර්ජනය විවේචනයට ලක් කළා.

එහි ලේකම් වෛද්‍ය කේ.කේ.එන්.සී ප්‍රේමරත්න ප්‍රකාශ කළේ රට ආපදා තත්ත්වයකට මුහුණදෙන අවස්ථාවක වර්ජන පැවැත්වීම සදාචාරාත්මක නොවන බවයි.
 
රජයේ වෛද්‍ය නිලධාරින්ගේ සංගමය වර්ජනය සංවිධාන කර ඇත්තේ පශ්චාත් සීමාවාසික වෛද්‍ය පත්වීම් ගැටලූවක් මුල් කරගෙනයි.

කෙසේ නමුත්, සෞඛ්‍ය අමාත්‍යාංශයේ අද පැවති මාධ්‍ය හමුවකට එක්වෙමින් සෞඛ්‍ය සේවා අධ්‍යක්ෂ ජනරාල් වෛද්‍ය පාලිත මහීපාල අදාළ පත්වීම් ලැයිස්තුව සකස් කිරීමේ බලපෑම් සිදුවූ බවට එල්ල වන චෝදනා ප්‍රතික්ෂේප කළා.