දේශීය සහ ආනයනික සහල්වලට පාලන මිල දෙකක්

දේශීය සහ ආනයනික සහල් සඳහා වෙන වෙනම පාලන මිල නියම කරන ලෙස ජනාධිපති මෛත්‍රිපාල සිරිසේන නිලධාරීන්ට උපදෙස් ලබාදී තිබෙනවා.

ඒ, සහල් මෝල් හිමියන් සහ සහල් ආනයනකරුවන් සමඟ අද පැවති සාකච්ඡාවේදියි. ජනාධිපති කාර්යාලයේ පැවති අදාළ සාකච්ඡාවේදී ජනාධිපතිවරයා සඳහන් කර ඇත්තේ වෙළඳපොලේ කිසිවිටකත් සහල් හිඟයක් ඇතිවිය නොහැකි බවයි.

ජනතාවට සහන මිලකට සහල් ලබාදීම සඳහා කඩිනම් ක්‍රමවේදයක් ක්‍රියාවට නැංවිය යුතු බවද ජනාධිපති මෛත්‍රිපාල සිරිසේන අවධාරණය කර තිබෙනවා.

සහල් ආනයනයේදී ලබාදී ඇති බදු සහනය උපරිම අයුරින් ජනතාව වෙත ලබාදිය යුතු බවද සඳහන් කළ ජනාධිපතිවරයා ඕනෑම අවස්ථාවක භාවිතයට ගැනීමට සහල් මෙටි‍්‍රක්  ටොන් ලක්ෂයක් රජයේ ගබඩාවල පැවතිය යුතු බවයි ප්‍රකාශ කළේ.

ජනාධිපති මෛත්‍රිපාල සිරිසේන සමඟ සහල් ආනයනකරුවන් අද සිදුකළ සාකච්ඡාවෙන් අනතුරුව මාධ්‍ය වෙත අදහස් දක්වමින් මරඳගහමුල සහල් වෙළඳුන්ගේ සංගමයේ සභාපති ඞී.කේ. රංජිත් සඳහන් කළේ පාලන මිල සංශෝධනය පිළිබඳව එහිදී අවධානය යොමුවූ බවයි.