ශ්‍රී ලංකාවේ යුක්තිය සහ සංහිදියාව තහවුරු කිරීම පමා වෙලා - ජගත් මානව හිමිකම් කොමසාරිස්ගෙන් චෝදනා

ශ්‍රී ලංකාවේ සංක්‍රාන්ති යුක්තිය ඉටු කරලීම පමාවීම සහ පසුගිය අපරාධ සම්බන්ධයෙන් වගවීම සඳහා පරිපූර්ණ ක්‍රමෝපායක් නොමැතිවීමෙන් තිරසාර සාමය ඇති කරලීම තවත් දුරස්ථවිය හැකි බව එක්සත් ජාතීන්ගේ මානව හිමිකම් කොමසාරිස්වරයා පවසනවා.

ශ්‍රී ලංකාව පිළිබද සිය වාර්තාව ඉදිරිපත් කරමින් ඔහු සදහන් කර ඇත්තේ රට තුළ සංහිදියාව සහ ස්ථාවරභාවය තහවුරු කරලීම සඳහා වන උද්යෝගය එමගින් හීන විය හැකි බවයි.

එක්සත් ජාතීන්ගේ මානව හිමිකම් කොමසාරිස් සෙයිද් රාද් අල් හුසේන් මෙම වාර්තාව ඉදිරිපත් කරනු ලැබුවේ ජිනිවා නුවර දැන් පැවැත්වෙන ජගත් මානව හිමිකම් මණ්ඩලයේ 34 වන සැසි වාරයටයි.

එහිදී වැඩිදුරටත් අදහස් දැක්වූ ජගත් මානව හිමිකම් කොමසාරිස්වරයා 2015 වසරේ ශ්‍රී ලංකාව පිළිබද සම්මත කර ගත් යෝජනාවේ සංක්‍රාන්ති යුක්තිය පිළිබඳ ක්‍රියාවලියේ කොටසකට පමණක් ශ්‍රී ලංකාව ප්‍රමුඛත්වය ලබාදී ඇති බවයි.

ඒ සඳහා අධිකරණ යාන්ත්‍රණයක් සැකසීම, සංකීර්ණ කටයුත්තක් බව පැහැදිලියි.

එහෙත් එම ක්‍රියාවලිය මේ වන විටත් අවසන් අදියරේ පැවතිය යුතු බවයි ජගත් මානව හිමිකම් කොමසාරිස්වරයා පෙන්වා දෙන්නේ.

මෙරට පක්ෂ දේශපාලනය සහ පාලන සන්ධානයේ බල තුලනය, යුද්ධයේ අපරාධ සම්බන්ධයෙන් වගවීමේ ක්‍රියාවලියේ දුෂ්කර කරුණුවලට ප්‍රතිචාර දැක්වීමේදී බලපා ඇති බව ඔහු ඉදිරිපත් කළ වාර්තාවේ වැඩිදුරටත් සඳහන්.

ව්‍යවස්ථා ප්‍රතිසංස්කරණ සහ සංහිදියාව නිසා මෙතෙක් ගෙන ඇති පියවර පිළිබදව ප්‍රසාදය පළ කළ ජගත් මානව හිමිකම් කොමසාරිස් සෙයිද් රාද් අල් හුසේන් කුමරු සංක්‍රාන්ත යුක්තිය ඉටුකරලීම අතිශය මන්දගාමී බවට චෝදනාවක් එල්ල කළා.