කටුනායක සියලූ ගුවන් මෙහෙයුම් හෙට මධ්‍යම රාත්‍රියේ සිට යළි ක්‍රියාත්මකයි (ඡායාරූප)

නවීකරණය කරන ලද කටුනායක බණ්ඩාරනායක ජාත්‍යන්තර ගුවන් තොටුපලේ ධාවන පථය හෙට (06) විවෘත කරන බව සිවිල් ගුවන් සේවා අධිකාරිය ප්‍රකාශ කළා.

එහි අධ්‍යක්‍ෂ ජනරාල් එච්.එම්.සී. නිමල්සිරි කියා සිටියේ ඒ අනුව හෙට මධ්‍යම රාත්‍රියේ සිට මෙතෙක් සීමා කර තිබූ සියලූ ගුවන් ගමන් සාමාන්‍ය පරිදි සිදුකරන බවයි.

පසුගිය ජනවාරි මස 6 වනදා එහි අලූත්වැඩියා කිරීම් ආරම්භ කළ අතර, ඒ අනුව මීටර 45 ක පළලින් යුත් ධාවන පථය මීටර 60 දක්වා පුළුල් කර තිබෙනවා.

කටුනායක ගුවන් තොටුපළ තුළ ගුවන් ධාවන පථ දෙකක් පවතින අතර , ඉන් පලමුවැන්න ඉදිකර ඇත්තේ 1970 වසරේදීයි.

එය දැනට උප ධාවන පථය ලෙස භාවිතාවට ගනිමින් පවතී.

දැනට භාවිතා කරන ප්‍රධාන ගුවන් ධාවන පථය 1986 දි කැනඩා රජයේ ආධාර මත ඉදිකර තිබේ.

අලුතින් ධාවන පථය සකස් කිරීමේ දී ප්‍රථමයෙන් උප ධාවන පථය සකසා නිම කර ඇති අතර, පසුව පළළ මීටර්  60 ක් ව තිබූ ප්‍රධාන ගුවන් ධාවන පථය මීටර් මීටර් 75 දක්වා පුළුල් කිරීම සිදු කර ඇත.

එහි දෙවන පියවර ලෙස දිගින් මීටර් 3350 ක්වූ ගුවන් ධාවන පථය මත තුන් වරක් නව ආස්තරණයන් අතුරා එය ශක්තිමත් කර තිබේ .

මීට අමතරව මෙතෙක් ගුවන් ධාවන පථයේ භාවිතා වූ පැරණි විදුලි ආලෝක පද්ධති ක්‍රමය ගලවා ඉවත් කර ස්වයංක්‍රීය ඩිජිටල් ආලෝක ධාරා පද්ධතියක් ද සකස් කර තිබීම විශේෂත්වයක්.  

නවීකරණ කටයුතු වලින් පසු හෙට (06) දහවල් 12.30 ට පමණ කටුනායක ගුවන් තොටුපළ නව ගුවන් ධාවන පථය විවෘත කිරීමට නියමිතය.

ඒ සදහා එම වේලාවට ශ්‍රී ලන්කන් ගුවන් සේවයේ විශේෂ යානයක් නව ධාවන පථය මත ගොඩබෑමට ද නියමිත බවයි වාර්තා වන්නේ.

ඒ අනුව මෙතෙක් A-380 වර්ගයේ ගුවන් යානා කටුනායක ගුවන් තොටුපළට ගොඩබැස්සීමේදී සහ පිටත්ව යෑමේදී මතු වූ දුෂ්කරතා පහවී යනු ඇති.

මීට පෙර එවැනි ගුවන් යානා කීපයක් වරින්වර කටුනායක ගුවන් තොටුපළ වෙත ගොඩබැස්සුවද , එය සිදු කළේ ආරක්ෂක හේතු මත හෝ හදිසි අවස්ථාවලදී පමණි.

එහෙත් ලොව විශාලතම ඕනෑම වර්ගයේ ගුවන් යානයක් කිසිදු අපහසුවකින් තොරව මෙහෙයවීමට අවශ්‍ය පහසුකම් දැන් කටුනායක ගුවන් තොටුපළ තුළ  සකස් කර තිබේ.



ඡායාරූප - ටී කේ ජී කපිල කටුනායක