අගමැති - ජපාන අගමැති හමුවේ

ශ්‍රී ලංකාවේ වරාය, ප්‍රවාහන, යටිතල පහසුකම් හා වෙනත් ජාතික මට්ටමේ සංවර්ධන කටයුතු වේගවත් කිරීම සඳහා විශේෂ සහයක් ලබාදීමට අපේක්ෂා කරන බව ජපාන අග්‍රාමාත්‍ය ෂින්සෝ අබේ ප්‍රකාශ කළා.

ඔහු මේ බව කියා සිටියේ නිල සංචාරයක නිරත අග්‍රාමාත්‍ය රනිල් වික්‍රමසිංහ සමඟ අද පැවති ද්විපාර්ශවික සාකච්ඡාවලදීයි.

ටෝකියෝ නුවර පිහිටි ජපාන අග්‍රාමාත්‍ය කාර්යාලයේ පැවති මෙම සාකච්ඡාවේදී ශ්‍රී ලංකාවේ ජාතික සංහිඳියාව ඇති කරලීම සඳහා පදනම් වන නව ව්‍යවස්ථාවක් සැකසීම සම්බන්ධයෙන්ද ජපානයේ පූර්ණ අනුග්‍රහය ලබාදෙන බව අග්‍රාමාත්‍ය ෂින්සෝ අබේ සඳහන් කළා.

එසේම ශ්‍රී ලංකාවේ ජාතික සංවර්ධන සැලැස්ම ක්‍රියාත්මක කරලීම ඔස්සේ ඉන්දියන් සාගරයේ ප්‍රධාන ආර්ථික කේන්ද්‍රස්ථානයක් ලෙස වර්ධනය වීම සඳහා අවශ්‍ය සහය ශ්‍රී ලංකාව වෙත ලබාදීමට ජපානය සූදානම් බවයි ඔහු කියා සිටියේ.

මෙහිදී අග්‍රාමාත්‍ය රනිල් වික්‍රමසිංහ සඳහන් කළේ ඉන්දීය සාගරය භාවිත කරන රාජ්‍යයන් හා ඉන්දීය සාගර කලාපීය රාජ්‍යයන් සියල්ල ඒකාබද්ධ කර ගනිමින් විශේෂ ඉන්දු සාගර සමුළුවක් සංවිධාන කිරීමට ශ්‍රී ලංකාව සැලසුම් කරමින් සිටින බවයි.

මෙම සමුළුව ඔස්සේ ඉන්දීය සාගර කලාපය සඳහා පොදු ආචාර ධර්ම හා නීතිරීති පද්ධතියක් සැකසීමේ පදනම නිර්මාණය කරගත හැකි බවද අග්‍රාමාත්‍යවරයා කියා සිටියා.

ත්‍රිකුණාමලය නගර සහ වරාය සංවර්ධන සැලැස්ම සකස් කිරීමෙන් පසු ඉන්දියාව සමඟ එක්ව එම කාර්යයන් සඳහා සම්බන්ධවීමට ජපානය පැමිණෙන්නේ නම් එය සතුටින් පිළිගන්නා බවයි ඔහු තවදුරටත් සඳහන් කළේ.

මෙම ද්විපාර්ශවික සාකච්ඡාවලින් අනතුරුව ජපාන - ශ්‍රී ලංකා අග්‍රාමාත්‍යවරුන් ඒකාබද්ධ මාධ්‍ය හමුවකටද එක්වුණා.

මේ අතර ශ්‍රී ලංකාවේ තිරසාර සංවර්ධන කාර්යයන් සම්බන්ධීකරණ කටයුතු සඳහා ජපාන විශේෂ නියෝජිතයෙකු ලෙස එරට අග්‍රාමාත්‍ය උපදේශක ආචාර්ය හිරොතේ ඉසුමි මහතා පත්කර තිබෙනවා.

අග්‍රාමාත්‍ය රනිල් වික්‍රමසිංහ මහතාගේ ජපාන නිල සංචාරය අතරතුර පැවැති ද්විපාර්ශ්වික සාකච්ඡාවලදී මේ බව අනාවරණ වුණා.