උපයෝගීතා කොමිසම අනුමත කළ විදුලි ජනන සැලැස්මට ඉංජිනේරුවන්ගේ විරෝධය

මහජන උපයෝගීතා කොමිසම මගින් අනුමත කළ මෙරට දිගුකාලීන විදුලි ජනන සැලැස්මට ලංකා විදුලිබල මණ්ඩල ඉංජිනේරු සංගමයේ විරෝධය පළ වනවා.

එහි සභාපති  සෞම්‍ය කුමාරවඩුගේ ප්‍රකාශ කළේ උපයෝගීතා කොමිසම අනුමත කර ඇත්තේ විදුලිබල මණ්ඩලය ඉදිරිපත් කළ සැලැස්මක් නොවන බවයි.

2018 වසරේ සිට 2037 දක්වා මෙරට විදුලි ජනනය සඳහා ලංකා විදුලිබල මණ්ඩලය ඉදිරිපත් කළ යෝජනාවලි අතුරින් ගල් අඟුරු භාවිතයෙන් තොර සැලසුම සඳහා මහජන උපයෝගීතා කොමිසමේ අනුමැතිය හිමි වුණා.

එහි අධ්‍යක්ෂ ජනරාල් දමිත කුමාරසිංහ හිරු ප්‍රවෘත්ති අංශයට ප්‍රකාශ කළේ ජනතා අදහස් සහ පරිසර හිතකාමී බව සැලකිල්ලට ගෙන එම පියවරට එළඹුණු බවයි.

කෙසේ නමුත්, ලංකා විදුලිබල මණ්ඩල ඉංජිනේරු සංගමයේ සභාපති සෞම්‍ය කුමාරවඩු කියා සිටියේ විදුලිබල මණ්ඩලය ඉදිරිපත් කළේ වඩාත්ම ලාභදායී සහ කාර්යක්ෂම සැලැස්ම බවයි.

ඉදිරි වසර 20 තුළ ස්වභාවික වායු මගින් මෙගාවොට් 4800ක විදුලිය නිපදවීමට අපේක්ෂා කරන අතර, සූර්ය බලශක්තිය ද මෙගවොට් 1389 දක්වා ඉහළ නැංවීමට සැලසුම් කර තිබෙනවා.

මහා පරිමාණ ජල විදුලිබලය මෙගාවොට් 242ක් ද මහජන උපයෝගීතා කොමිසම අනුමත කළ සැලැස්මට ඇතුළත්.

කෙසේ නමුත්, අනුමත කළ සැලැස්ම යළි ඇගයීම සම්බන්ධයෙන් මහජන උපයෝගීතා කොමිසම සමඟ සාකච්ඡා කිරීමට බලාපොරොත්තු වන බව විදුලිබල අමාත්‍යාංශයේ මාධ්‍ය ප්‍රකාශක සුලක්ෂණ ජයවර්ධන සඳහන් කළා.