පයාගලදී දුම්රියකට ගල් ප්‍රහාරයක් - පරීක්ෂණ ඇරඹේ

අලුත්ගම සිට කොළඹ - කොටුව බලා ධාවනය වූ දුම්රියකට පයාගල දුම්රිය ස්ථානය ආසන්නයේදී ගල් ප්‍රහාර එල්ල කිරීමේ සිද්ධියක් සම්බන්ධයෙන් දුම්රිය දෙපාර්තමේන්තුව විශේෂ පරීක්ෂණයක් ආරම්භ කර තිබෙනවා.

දුම්රිය දෙපාර්තමේන්තුවේ අතිරේක සාමාන්‍යාධිකාරී විජය සමරසිංහ හිරු ප්‍රවෘත්ති අංශය කළ විමසීමකදී සඳහන් කළේ එම ගල් ප්‍රහාරයන් එල්ල කිරීමට හේතුව සෙවීමට සහ ඊට සම්බන්ධ පුද්ගලයින් අත්අඩංගුවට ගැනීමට මේ වනවිට දුම්රිය ආරක්ෂක හමුදාවේ නිලධාරීන් යොදවා ඇති බවයි.

ඊයේ පස්වරු 6 ට පමණ එල්ලවූ මෙම ගල් ප්‍රහාරවලින් අදාළ දුම්රියේ ප්‍රධාන නියාමකවරයා තුවාල ලබා කළුතර - නාගොඩ රෝහලට ඇතුළත් කෙරුණා.

එමෙන්ම පෙරේදා දිනයේදී කොළඹ කොටුව සිට කන්කසන්තුරේ බලා ධාවනය වූ නගරාන්තර දුම්රියට ද චුන්නාක්කම් ප්‍රදේශයේදී ගල් ප්‍රහාරයක් එල්ල වී තිබුණා.

මේ අතර හුණුපිටිය දුම්රිය හරස් මාර්ගයේදී ඊයේ සිදුවූ දුම්රිය අනතුර පිළිබඳව විශේෂ විමර්ශනයක් සිදුකිරීමටද දුම්රිය දෙපාර්තමේන්තුව තීරණය කර තිබෙනවා.