කුරුණෑගලින් පලා ආ වන අලියා රඹුක්කනට

කුරුණෑගල - කැප්පෙටිගල ප්‍රදේශයේ සිදුකළ වන අලි මෙහෙයුමකින් පසු පළා ආ වන අලියෙකු මේ වන විට කෑගල්ල - රඹුක්කන - හලාගිරිය ප්‍රදේශයට පැමිණ තිබෙනවා.

එම වන අලියා පලවා හැරීම සඳහා අද (01) උදෑසන සිට වනජීවි නිලධාරීන් සහ පොලිස් විශේෂ කාර්ය බලකායේ නිලධාරීන් එක්ව විශේෂ මෙහෙයුමක් ආරම්භ කර ඇති බවයි අප වාර්තාකරු සඳහන් කළේ.

කෙසේ වෙතත්, මෙම වන අලියා නැරඹීමට පැමිණීමෙන් වැලකී සිටින ලෙසයි මෙහෙයුමට එක්ව සිටින වනජීවි දෙපාර්තමේන්තුවේ මෙහෙයුම් අධ්‍යක්ෂ මංජුල අමරරත්න ජනතාවගෙන් ඉල්ලා සිටියේ.  

මේ අතර, හම්බන්තොට - ලුණුගම්වෙහෙර - උඩමත්තල ප්‍රදේශයට අද අලුයම කඩා වැදුණු වන අලියෙකු හේතුවෙන් ප්‍රදේශවාසීන් භීතියට පත්ව තිබෙනවා.

වන අලියා පහරදීමෙන් නිවසකට දැඩි හානි සිදුව ඇති අතර, පසුව ප්‍රදේශවාසීන්ගේ මැදිහත්වීමෙන් එම සත්ත්වයා පලවා හැර තිබෙනවා.

එමෙන්ම දිඹුලාගල - නවමිල්ලාන ප්‍රදේශයේ වන අලියෙකු රෝගී වී ඇති බවට ලැබුණු තොරතුරක් මත වනජීවි නියෝජ්‍ය අමාත්‍ය පාලිත තෙවරප්පෙරුම නිලධාරීන් සමඟ අලියා වැටී සිටින ස්ථානයට අද පැමිණ තිබෙනවා.

අලියා, නිර්වින්දනය කොට ප්‍රතිකාර කිරීම ආරම්භ කළ බවයි නියෝජ්‍ය අමාත්‍යවරයා සඳහන් කළේ.