බලපත්‍ර යටතේ වාහන ආනයනයට යළි අවසර

ඩොලරයට සාපේක්ෂව රුපියලේ අගය පහත වැටීම සහ විදේශ සංචිත පිරිහීම හේතුවෙන් බලපත්‍ර යටතේ වාහන ආනයනයට පැනවුණු සීමාවන් ක්‍රමානුකූලව ඉවත් කරන බව මුදල් අමාත්‍ය මංගල සමරවීර අද පාර්ලිමේන්තුවේදී ප්‍රකාශ කළා.

ඒ අනුව තීරු බදු රහිත වාහන ආනයනය සඳහා පසුගිය වසරේ සැප්තැම්බර් 30 වන දාට පෙර ලබා ගත් වාහන බලපත්‍ර සඳහා ලබන ජුනි 1 වන දායින් පසු ණයවර ලිපි විවෘත කළ හැකි බව මුදල් අමාත්‍ය මංගල සමරවීර අද පාර්ලිමේන්තුවේදී ප්‍රකාශ කළා.

ඔහු මේ බව කියා සිටියේ විදේශ විනිමය වැය වන රථ වාහන ආනයනය සීමා කිරීම පිළිබඳ පාර්ලිමේන්තු මන්ත්‍රී අනුර කුමාර දිසානායක මීට පෙර යොමු කළ ප්‍රශ්නයකට අද පිළිතුරු ලබාදෙමින්.

මේ අනුව පසුගිය නොවැම්බර් 30 වන දාට පෙර ලබා ගත් බලපත්‍ර සඳහා ලබන ජුලි 1 වන දායින්  පසුව ණයවර ලිපි විවෘත කළ හැකි අතර පසුගිය වසරේ පෙබරවාරි 28 වන දාට පෙර ලබා ගත් බලපත්‍ර සඳහා ලබන අගෝස්තු 1 වන දායින් පසුව ණයවර ලිපි විවෘත කළ හැකි බව ද මුදල් අමාත්‍යවරයා සදහන් කළා.

එසේම මේ වසරේ ජුලි 30 වනදාට පෙර ලබා ගන්නා වාහන බලපත්‍ර සඳහා සැප්තැම්බර් 1 වන දායින් පසුවත්, ඔක්තෝම්බර් 1 වන දායින් පසුව ලබා ගන්නා බලපත්‍ර සඳහා  ඕනෑම දිනෙකත් ණයවර ලිපි විවෘත කළ හැකි බවයි මුදල් අමාත්‍ය මංගල සමරවීර වැඩිදුරටත් කියා සිටියේ.