පළාත් දෙකක එළවලු වගාවට හදුනා නොගත් රෝගයක්

උතුරුමැද පළාතේ සහ මධ්‍යම පළාතේ එළවළු වගා කරන ප්‍රදේශ බොහොමයක මෙවර එළවළු වගාවට හඳුනා නොගත් රෝගයක් වැළඳීම නිසා වගාවන්  විනාශ වෙමින් පවතින බව ගොවීන් පවසනවා.

විශේෂයෙන් උතුරුමැද පළාතේ අනුරාධපුර දිස්ත්‍රික්කයේ සහ පොළොන්නරුව දිස්ත්‍රික්කයේ මධ්‍යම පළාතේ මාතලේ දිස්ත්‍රික්කයේ මෙම රෝග තත්ත්වයන් නිසා විශාල වගා බිම් ප්‍රමාණයක් විනාශවීම හේතුවෙන් ගොවීන් දැඩි ආර්ථික දුෂ්කරතාවයකට පත්ව ඇතැයි ඔවුන් පවසනවා.
 
ගොවීන් කියා සිටින්නේ වැල් සහිත  වගාවන් මෙයාකාරයෙන් වැඩි වශයෙන් පත්‍ර  කොඩ වීම, පත්‍ර කහවීම කුඩා කාලයේ සිටම ගෙඩි හට නොගැනීම හටගන්නා ගෙඩිය කුඩා කාලයේම විනාශ වීම ආදී රෝග රැසක් පවතින බවයි.

මේ  පිළිබඳව සොයා බැලීම සඳහා  දේවහුව, වටගල, කලාවැව, දඹුලු හල්මිල්ලෑව,හබරත්තවල , බුදුගේහින්න ,ගල්නෑව ,නාවුල ,ලග්ගල ,හබරණ ,ආදී  ප්‍රදේශවලට ගිය විට විශාල වශයෙන් වගා විනාශයන් දැක ගැනීමට හැකි වී තිබෙනවා.

වට්ටක්කා ,කැකිරි ,පිපිඤ්ඤා ,කොමඩු, දඹල, වැටකොළු,බෝංචි ,කරවිල ,මැකරල් ,පතෝල ,ආදී එළවලුවලට අමතරව, වී වගාවට ද මෙම රෝගය ගොදුරුවී ඇති බව දක්නට තිබෙනවා.

ගොවීන් කියාසිටින්නේ මෙම තත්වය සොයා බැලීම සඳහා මෙතෙක් කිසිදු රජයේ වගකිවයුතු නිලධාරියකු තම ප්‍රදේශයට නොපැමිණි බවයි .

තම  මුදල් මෙන්ම අත කණකර, උකසට තබා විවිධ ස්ථානවලට ණය වී ගොවිතැන් ආරම්භ කළ ද මේවනවිට අස්වැන්න හටගන්නා අවස්ථාවේදීම විනාශයට ලක්වන බව ගොවීන් වැඩිදුරටත් පවසනවා.

මෙම වගාවන් සඳහා සහනාධාර පොහොර ලබාගෙන ගොවි රක්ෂණ මණ්ඩලයේ රක්ෂණය කොට තිබුණද මෙතෙක් අඩුම තරමේ රක්ෂණ වන්දියක් හෝ නොලැබෙන බව ඔවුන් පවසනවා.
 
උතුරුමැද පළාතේ සහ මධ්‍යම පළාතේ කෘෂිකර්ම බලධාරීන්ගේ අවධානය කඩිනමින් මේ පිළිබඳව යොමු කරන්නැයි ඉල්ලා සිටිනවා.