ඉන්දියාවේ දෙවන කොරෝනා වෛරස ආසාදිතයා කේරළ ප්‍රාන්තයෙන්

ඉන්දියාවේ දෙවන කොරෝනා  වෛරස් ආසාදිතයා කේරළ ප්‍රාන්තයෙන් හමුවී තිබෙනවා.

එරට පළමු අසාදිත තැනැත්තියද මීට දින 3 කට පෙර වාර්තාවූයේ කේරළ ප්‍රාන්තයෙන්.

දැන් හමුවී ඇති ආසාදිතයා වෙන්කොට ප්‍රතිකාර කරනු ලබන අතර, එම රෝගියාගේ තත්ත්වය සමීපව අධීක්ෂණය කරනු ලබන බවයි ඉන්දීය සෞඛ්‍ය අමාත්‍යාංශය ප්‍රකාශ කළේ.

එම ආසාදිතයා නිරන්තරයෙන් චීනයේ සංචාරයන්හි නිරතවන අයෙකු වන අතර, අවසන් වරට චීනයේ සිට පැමිණ ඇත්තේ පසුගිය ජනවාරි 24 වනදායි.

මේ අතර ඉන්දියාව වූහාන් නගරයේ සිටි තවත් ඉන්දියානුවන් 323 දෙනෙකු අද ගුවන් මගින් ඉවත් කරගනු ලැබුවා.

ඊයේ දිනයේදීද එලෙස ඉන්දියානුවන් 324 දෙනෙකු ඉවත් කරගැනීමටයි ඉන්දියාව පියවර ගත්තේ. ඉන්දීය ගුවන් සේවයට අයත් විශේෂ ගුවන් යානයකින් මෙලෙස දෙවන වරට ඉවත් කරගත් ඉන්දියානුවන් 323 දෙනා රැගත් යානය නවදිල්ලි ගුවන් තොටුපලට අද උදෑසන 9.45 ට පමණ ගොඩබස්සවා තිබෙනවා.

ඒ සමඟම මාලදිවයින් ජාතිකයින් හත්දෙනෙකුම එම ගුවන් යානයෙන්ම වූහාන් නගරයේ සිට රැගෙන ආ බවයි වාර්තාවන්නේ.

ඒ සම්බන්ධයෙන් මාලදිවයින් විදේශ අමාත්‍යවරයා ඉන්දීය අග්‍රාමාත්‍ය නරේන්ද්‍ර මෝදි සහ විදේශ කටයුතු අමාත්‍ය එස්. ජයශංකර් වෙත ස්තූතිය පළ කර තිබෙනවා.