අලි රොෂාන්ගේ තවත් 'පැටවුන්' දෙදෙනෙකු අල්ලයි

ව්‍යාජ ලේඛන සකසා ළඟ තබාගෙන සිටි තවත් අලි පැටවුන් දෙදෙනෙකු පන්නිපිටියේ - ඇරැව්වල ප්‍රදේශයේ පිහිටි අලි රොෂාන්ට අයත් ඉඩමකින් ඊයේ (07) සොයාගෙන තිබෙනවා. පොලිස් මාධ්‍ය ප්‍රකාශක කාර්යාලය සඳහන් කළේ කැස්බෑව මහේස්ත්‍රාත් අධිකරණයෙන් ලබාගත් නියෝගයක් අනුව මෙම අලි පැටවුන් දෙදෙනා වනජීවී භාරයට ගත් බවයි.

රහස් පොලීසිය ඊයේ කැස්බෑව මහේස්ත්‍රාත් අධිකරණයට දන්වා සිටියේ ව්‍යාජ ලේඛණ සකස් කර මෙම අලි පැටවුන් දෙදෙනා රඳවා ගෙන සිටින බවයි. ඒ අනුවයි රහස් පොලීසිය සහ වනජීවී නිලධාරීන් එක්ව අලි රොෂාන්ට අයත් ඉඩමේ සිටි මෙම අලි පැටවුන් දෙදෙනා සොයාගෙන ඇත්තේ.

මෙම අලි පැටවුන් දෙදෙනා අවුරුදු 5 ත් 7 අතර වයසේ පසුවන බවයි වාර්තාවන්නේ. එම අලි පැටවුන් දෙදෙනා දැනට දෙහිවල සත්වෝද්‍යානය භාරයේ පසුවනවා. ඉදිරියේදී පින්නවල අලි අනාථාගාරයට රැගෙන යාමට නියමිත බවයි වනජීවී දෙපාර්තමේන්තුවේ නිලධාරියෙකු හිරු ප්‍රවෘත්ති අංශයට සඳහන් කළේ.

නිරාජ් රොෂාන් හෙවත් අලි රොෂාන්ට අයත් යැයි සැළකෙන තවත් අලින් දෙදෙනෙකු පසුගිය මස පළමුවනදා බලපත්‍ර නොමැතිව ළඟ තබාගෙන සිටියදී කඩුවෙල නවගමුව පත්තිනි දේවාලය ආශ්‍රිත ප්‍රදේශයෙන් සොයාගත්තා. එහිදී වනජීවී අධ්‍යක්‍ෂ ජනරාල් එච්.ඩී. රත්නායක සඳහන් කළේ, අලි රොෂාන්ට අයත් යැයි සැළකෙන තවත් අලි තුන්දෙනෙකු සොයා පරීක්ෂණ ක්‍රියාත්මක කරන බවයි.