දළදා මාළිගාව ඉදිරිපිට මාර්ගය විවෘත කිරීමට අස්ගිරි මල්වතු නාහිමිවරුන්ගේත් විරෝධය

ශ්‍රී දළදා මාලිගාව ඉදිරිපිටින් වැටී ඇති මාර්ගය යළි විවෘත කිරීමට මල්වතු - අස්ගිරි උභය විහාර පාර්ශ්වය සිය විරෝධය පළ කරනවා.

අස්ගිරි පාර්ශ්වයේ මහ නායක අති පුජ්‍ය ගලගම ශ්‍රී අත්ථදස්සී මහ නාහිමියන් පවසන්නේ එය ශ්‍රී දළදා සමිදුන්ට සිදු කරන අගෞරවයක් බවයි.

ශ්‍රී දළදා මාලිගාව ඉදිරිපිටින් වැටී ඇති මහනුවර - මහිංයගන ඒ - 26 මාර්ගයේ කිලෝමීටරයක පමණ කොටස පසුගිය යුදමය සමයේදී වසා දැමීමට පියවර ගෙන තිබුණා.

මේ නිසා එම මාර්ගයේ දැඩි රථ වාහන තදබදයක් සහ විශාල වායු දූෂණයක් වන බවට පවසමින් වසා දැමුණු මාර්ග කොටස යළි විවෘත කරන්නැයි විවිධ පාර්ශ්ව වෙතින් මෑත කාලයේ ඉල්ලීම් ඉදිරිපත් වුණා.

ඒ සම්බන්ධයෙන් පසුගිය සිකුරාදා පැවැති විරෝධතාවක් අතරතුර දෙපිරිසක් අතර උණුසුම් තත්ත්වයක් ද හට ගැනුණා.

කෙසේ වෙතත් අස්ගිරි පාර්ශ්වයේ කාරක සංඝ සභාව අද මහනුවරදී විශේෂ හමුවක් සංවිධාන කර තිබුණේ එම මාර්ගය වෙනුවට විකල්ප මාර්ගයක් හදුන්වාදෙන ලෙස රජයට යෝජනා කිරීම සඳහායි.

ඊට මල්වතු පාර්ශ්වයේ අනු නායක නියංගොඩ විජිත සිරි අනු නාහිමියන් ප්‍රමුඛ එම පාර්ශ්වයේ කාරක සංඝ සභික ස්වාමින්වහන්සේ පිරිසක් ද එක්ව සිටි අතර  මහනුවර සිවිල් සංවිධාන සහ සංගම් නියෝජිතයන් පිරිසක් ද ඊට එක්වුණා.

අස්ගිරි පාර්ශවයේ මහනායක අතිපූජ්‍ය ගලගම ශ්‍රී අත්ථදස්සී මහ නාහිමියන් මාධ්‍ය වෙත අදහස් දක්වමින් කියා සිටියේ මෙම මාර්ගය විවෘත කිරීමට විරුද්ධ බවයි.