එක්නැලිගොඩ අතුරුදන්වීමේ සිද්ධියට සම්බන්ධ 4කට ඇප

මාධ්‍යවේදී ප්‍රගීත් එක්නැලිගොඩ අතුරුදන්වීමේ සිද්ධියට අදාළව රක්ෂිත බන්ධනාගාර ගත කර සිටි හමුදා බුද්ධි අංශ සාමාජිකයන් 4 දෙනෙකුට අවිස්සාවේල්ල මහාධිකරණය මගින් අද ඇප නියම කෙරුණා.

ඔවුන්ට මුදලින් රුපියල් ලක්ෂ 2 බැගින් වූ ඇප 4 බැගින් නිකුත් කළ අතර, රුපියල් ලක්ෂ 3 බැගින් වූ ශරීර ඇප 4 බැගින් ද නියම කර තිබෙනවා.

මීට අමතරව සෑම මසකම අවසන් ඉරිදා දිනයේ කොළඹ අපරාධ පරීක්ෂණ දෙපාර්තමේන්තුවේ පෙනී සිටින ලෙසයි සැකකරුවන්ට නියෝග කෙරුණේ.

ඔවුන්ගේ විදේශ ගමන් බලපත්‍ර ද අධිකරණ භාරයට ගෙන තිබෙනවා.

2010 වසරේ ජනවාරි 24 වන දා මාධ්‍යවේදී ප්‍රගීත් එක්නැලිගොඩ අතුරුදන් වූයේ එම වසරේ ජනාධිපතිවරණයට දින දෙකකට පෙරයි.

ඔහුගේ අතුරුදන්වීම සම්බන්ධයෙන් හමුදා නිලධාරීන් දස දෙනෙකු අත්අඩංගුවට ගැනුණු අතර, සිද්ධියේ දෙවන සැකකරු ලෙස නම් කළ හමුදා ලුතිනන් කර්නල්වරයාට පසුගිය මැයි මස 27 වන දා ඇප නියම කෙරුණා.

ප්‍රදීප් එක්නැලිගොඩ අතුරුදන්වීමේ සිද්ධියට අදාළව අත්අඩංගුවට ගෙන සිටින හමුදා බුද්ධි අංශ නිලධාරීන් ගොනුකළ මූලික අයිතිවාසිකම් පෙත්සම් විභාගයට ගැනීමට ශ්‍රේෂ්ඨාධිකරණය අවසර ලබාදුන්නේ පසුගිය ජුනි 01 වන දායි.