තලාව බැංකු කොල්ලයේ සැකකරුවන් හඳුනා ගැනේ

රුපියල් නව කෝටි පනස් ලක්ෂය ඉක්ම වූ අනුරාධපුර - තලාව බැංකු කොල්ලයේ සැකකරුවන් හඳුනාගෙන තිබෙනවා.

පොලීසිය සඳහන් කළේ ඊට අදාළ සැකකරුවන් ඉදිරි දින දෙක තුළ අත්අඩංගුවට ගැනීමට හැකියාවක් පවතින බවයි.

සිද්ධිය පිළිබඳ පරීක්ෂණ සඳහා මේ වන විට පොලිස් කණ්ඩායම් 8ක් යොදවා තිබෙනවා.

එමෙන්ම පොලිස්පතිවරයාගේ උපදෙස් මත අදාළ පරීක්ෂණ අපරාධ පරීක්ෂණ දෙපාර්තමේන්තුව වෙත භාරදීමටයි කටයුතු කර ඇත්තේ.

මේ අතර, කොල්ල කන ලද රාජ්‍ය බැංකුවේ කටයුතු බාධාවකින් තොරව ඉදිරියට කරගෙන යාම සඳහා ජංගම සේවාවක් ක්‍රියාත්මක කිරීමට පියවරගෙන තිබෙනවා.

මහජනතාවට බාධාවකින් තොරව බැංකු කටයුතු සිදුකිරීම සඳහා ජංගම රථයක් මගින් බැංකු කටයුතු ආරම්භ කර ඇති බවටයි වාර්තා වන්නේ.

කොල්ල කන ලද රාජ්‍ය බැංකුව සඳහා මේ වන විට විශේෂ පොලිස් ආරක්ෂාවක් ද ලබාදී තිබෙනවා.

තලාව නගරයේ පිහිටි රාජ්‍ය බැංකු ශාඛාවකින් සොරා ගන්නා ලද රන් භාණ්ඩ සහ මුදල්වල වටිනාකම දැනට රුපියල් නව කෝටි පනස් ලක්ෂයක් ලෙස තක්සේරු කර තිබෙනවා.

පසුගිය 29 වනදා පස්වරු 6.40ත් ඊයේ උදෑසන 7.10ත් අතර කාලයේදී මෙම සොරකම සිදුව ඇති අතර එහිදී සොරාගන්නා ලද මුදල්වල වටිනාකම රුපියල් එක් කෝටි හැත්තෑ ලක්ෂයක් වනවා.

එමෙන්ම බැංකුවේ උකසට ගෙන තිබූ කිලෝ 22 ග්‍රෑම් 806 බර රන් භාණ්ඩ ද සොරුන් රැගෙන ගොස් ඇති අතර එහි වටිනාකම රුපියල් හත් කෝටි අසූ ලක්ෂයකට ආසන්නයි.  

බැංකුවෙහි පිටුපස දොර කඩා කොල්ලකරුවන් ඊට ඇතුළු වී ඇති අතර, පසුව එහි තිබූ සේප්පු 3ක් කඩා විවෘත කොට මෙම මුදල් සහ රන් ආභරණ කොල්ල කා තිබෙනවා.

බැංකුවෙහි සවි කර තිබූ ආරක්ෂක සංඥා පද්ධතිය සහ කැමරා පද්ධතිය ද ගලවාගෙන ගොස් ඇති බවටයි පොලීසිය සඳහන් කළේ.