ශ්‍රී ලන්කන් කොමිසමෙන් ගෝඨාභය ඇතුළු 4 දෙනෙකුට නොතීසි

ශ්‍රී ලන්කන් සහ මිහින්ලංකා ආයතනවල සිදුවූ බව කියන දූෂණ පිළිබදව සෙවීමට පත් කර ඇති ජනාධිපති පරීක්ෂණ කොමිසම හමුවේ පෙනී සිටින ලෙසට දැනුම් දෙමින් හිටපු ආරක්ෂක ලේකම් ගෝඨාභය රාජපක්ෂ ඇතුළු සිව් දෙනෙකුට නොතීසි නිකුත් කෙරුණා.

හිටපු ආරක්ෂක ලේකම්වරයාට අමතරව විදේශ කටයුතු අමාත්‍යාංශයේ හිටපු අධීක්ෂණ මන්ත්‍රී සජින් වාස් ගුණවර්ධන, ශ්‍රී ලන්කන් ගුවන් සමාගමේ හිටපු සභාපති නිශාන්ත වික්‍රමසිංහ සහ ශ්‍රී ලන්කන් ගුවන්  සමාගමේ හිටපු විධායක නිලධාරී කපිල චන්ද්‍රසේන මෙලෙස නොතීසි නිකුත් කෙරුණු සෙසු පුද්ගලයින්.

ශ්‍රී ලන්කන් සහ මිහින්ලංකා ආයතනවල සිදුවූ බව කියන දූෂණ සිද්ධීන් සම්බන්ධයෙන් සිදුකෙරෙන පරීක්ෂණවලදී හෙළි වූ තොරතුරු සම්බන්ධයෙන් ප්‍රකාශ ලබා ගැනීම සඳහා මෙම පිරිස කොමිසම හමුවට කැදවීමට නියමිතයි.

ඒ අනුව මිහින්ලංකා ගුවන් සමාගමේ අධ්‍යක්ෂවරයෙකු ලෙස කටයුතු කළ හිටපු ආරක්ෂක ලේකම් ගෝඨාභය රාජපක්ෂට ලබන 29 වන දාත්, විදේශ කටයුතු අමාත්‍යාංශයේ හිටපු අධීක්ෂණ මන්ත්‍රී සජින් වාස් ගුණවර්ධනට අනිද්දාත්, ශ්‍රී ලන්කන් ගුවන් සමාගමේ හිටපු සභාපති නිශාන්ත වික්‍රමසිංහට සහ එහි හිටපු ප්‍රධාන විධායක නිලධාරීවරයාට හෙට දිනයේ්ත් කොමිසම හමුවේ පෙනී සිටින ලෙසටයි දැනුම් දී ඇත්තේ.

මේ අතර, මෙම කොමිසමේ අපරාධ පරීක්ෂණ දෙපාර්තමේන්තු නිලධාරීන් හමුවේ ප්‍රකාශයක් ලබාදීම සඳහා  ඊයේ අමාත්‍ය, ආචාර්ය සරත් අමුණුගම එහි පැමිණියා.

ප්‍රකාශය ලබාදීමෙන් පසුව පිටතට පැමිණි අමාත්‍යවරයා මාධ්‍යවේදීන් නැගූ ප්‍රශ්නවලට පිළිතුරු ලබාදෙමින් කියා සිටියේ හිටපු ජනාධිපති මහින්ද රාජපක්ෂ යළි ජනාධිපතිවරණයට ඉදිරිපත්වීමට ශ්‍රේෂ්ඨාධිකරණයේ මතය විමසීමට නොහැකි හෙයින් ඊට වෙනත් මාර්ගයක් භාවිත කළ යුතු බවයි.