නව රජයේ පළමු විදේශ ආයෝජනය ඇමරිකන් ඩොලර් මිලියන 250ක්

නව රජයේ පළමු විදේශීය ආයෝජනය ලෙස ඇමරිකානු ඩොලර් මිලියන 250ක මිශ්‍ර ව්‍යාපෘතියක වැඩ ආරම්භ කිරීම නුදුසුරේදීම සිදුකරන බව මුදල්, ආර්ථික සහ ප්‍රතිපත්ති සංවර්ධන අමාත්‍යාංශය පවසනවා.

එම විදේශීය ආයෝජන ව්‍යාපෘතිය තුළින් මහල් 30ක වානිජ කුළුණක් ඉදිකිරීමට යෝජිත අතර, නව නිවාස ඒකක 700ක් ද ස්ථාපනය කිරීමට නියමිතයි.

එමෙන්ම වෙළඳසැල් සඳහාද ගොඩනැගිල්ල තුළ ඉඩකඩ පවතින බව මුදල් අමාත්‍යාංශය සඳහන් කළා.

කොළඹ බාලදක්ෂ මාවතේ බේරේ වැව සහ ෂැංග්‍රිලා හෝටලය අතර පිහිටි අක්කර තුනක භූමි භාගය තුළ මෙම ආයෝජනය සිදුකිරිමට නියමිතයි.

අග්‍රාමාත්‍ය මහින්ද රාජපක්ෂ මුදල්, ආර්ථික කටයුතු හා ප්‍රතිපත්ති සංවර්ධන අමාත්‍යවරයා ලෙස අදාළ සමාගමට ආයෝජන කටයුතු සඳහා පහසුකම් සැළසීම සම්බන්ධයෙන් ඉදිරිපත් කළ අමාත්‍ය මණ්ඩල පත්‍රිකාවට අනුමැතිය ද හිමිවුණා.

ආයෝජනය සඳහා ගිවිසුම් අත්සන් කිරීම නුදුරු දිනකදී සිදුවන අතර, අදාළ භූමිය එම සමාගමට බදු පදනම මත ලබාදීමටයි නියමිතව ඇත්තේ.

එහිදී බදු කුලිය ලෙස ඇමරිකන් ඩොලර් මිලියන 43ක මුදලක් ශ්‍රී ලංකා රජය වෙත ලැබෙනු ඇති.