බ්‍රිතාන්‍ය සෞඛ්‍ය අමාත්‍යවරියටත් කොරෝනා වෛරසය ආසාදනය වෙයි

බ්‍රිතාන්‍ය සෞඛ්‍ය අමාත්‍යවරිය වන නැදින් ඩොරිස් මහත්මියට ද කොවිඩ් 19 හෙවත් නව කොරෝනා වෛරසය ආසාදනය වී තිබෙනවා.

ලොව රටවල් 115කින් මේ වනවිට වාර්තා වන ආසාදිතයින් ගණන එක් ලක්ෂ 18,000කට අධිකයි.

මින් ජීවිතක්ෂයට පත්වූ පුද්ගලයන් ගණන 4300ක් දක්වා ඉහළ ගොස් තිබෙනවා.

බ්‍රිතාන්‍ය සෞඛ්‍ය දෙපාර්තමේන්තුවේ පවසන්නේ 62 හැවිරිදි නැදින් ඩොරිස් පසුගිය බ්‍රහස්පතින්දා කොවිඩ් 19 රෝගී ලක්ෂණ පෙන්නුම් කළ බවයි.

ඒ, එදින ඇය බ්‍රිතාන්‍ය අග්‍රාමාත්‍ය බොරිස් ජොන්සන් ද සහභාගි වූ එරට ඩඩ්නින් ස්ට්‍රිට් හි ජාත්‍යන්තර කාන්තා දිනය වෙනුවෙන් පැවැති වැඩසටහනකට එක්වීමෙන් පසුවයි.

ඇය මේ වනවිට සිය නිවස තුළ ස්වයං නිරෝධායන ක්‍රියාවලියකට යොමුවී ඇති අතර විදෙස් මාධ්‍ය වාර්තා කරන්නේ තමන් සමඟ නිවසේ රැඳී සිටින 84 හැවිරිදි සිය මව ද සෙම්ප්‍රතිශ්‍යාව සහ කැස්ස රෝගී ලක්ෂණ පෙන්නුම් කිරීම හේතුවෙන් මාරාන්තික වෛරසය ඇයට ද ආසාදනය වී ඇති බවට සැක කෙරෙන බවයි.

කෙසේ වෙතත් බ්‍රිතාන්‍ය අග්‍රාමාත්‍යවරයා කොවිඩ් 19 පරීක්ෂණකට මෙතෙක් සහභාගි වී ඇති බවට අග්‍රාමාත්‍ය කාර්යාලය කිසිඳු ප්‍රකාශයක්
කර නැහැ.

එක්සත් රාජධානියෙන් මේ වනවිට ආසාදිතයින් 382 දෙදෙනෙක් සොයාගෙන ඇති අතරල එරටින් වාර්තා වී ඇත්තේ පුද්ගල මරණ 6ක් පමණයි.