කොළඹ, ගම්පහ සහ කලුතරට යලි දැනුම් දෙන තුරු ඇදිරි නීතිය

කොළඹ, ගම්පහ සහ කලුතර දිස්ත්‍රික්ක තුළ දැනට ක්‍රියාත්මක ඇඳිරි නීතිය නැවත දැනුම්දෙන තුරු බලපැවැත්වෙන බව ජනාධිපති මාධ්‍ය අංශය පවසනවා.

පුත්තලම, වව්නියාව, මන්නාරම, කිලිනොච්චි, මුලතිව් සහ යාපනය දිස්ත්‍රික්වල දැන් ක්‍රියාත්මක ඇඳිරි නීතිය සිකුරාදා (27) පෙරවරු 6ට ඉවත් කෙරෙන අතර එදිනම දහවල් 12ට නැවත පවනු ලබනවා.

සෙසු දිස්ත්‍රික්වල දැනට ක්‍රියාත්මක ඇඳිරි නීතිය හෙට පෙරවරු 6ට ඉවත් කෙරෙන අතර යළිත් දහවල් 12ට පැනවෙනු ඇති.

දිවයිනේ දිස්ත්‍රික්ක අතර ගමනාගමනය සම්පූර්ණයෙන්ම තහනම් කර තිබෙනවා.

එමෙන්ම විදේශීය සංචාරකයන් තැනින් තැනට ගෙන යාම ද සම්පුර්ණයෙන්ම තහනම් බවයි ජනාධිපති මාධ්‍ය අංශය නිවේදනය කළේ.

ඇඳිරි නීතිය බලපැවැත්වෙන කාලය තුල ඕනෑම දිස්ත්‍රික්කයක ගොවිතැන් වැඩ කරන සහ කුඩා තේ වතු මෙන්ම අපනයන බෝග නිෂ්පාදන ක්‍රියාවලියෙහි නිරත ජනතාවට අදාල වැඩ කිරීමට අවසර හිමිවනවා.

මාධ්‍ය සේවා සඳහා මෙන්ම සහල් ඇතුලු අත්‍යවශ්‍ය ද්‍රව්‍ය හා එළවලු ප්‍රවාහනයට ඉඩ දෙනු ලබනවා.

ගුවන් මගීන් සඳහා ගුවන් තොටුපළ හා වරාය සේවා පවත්වාගෙන යාමට ද අවසර පවතිනවා.