බෞද්ධ තොරතුරු කේන්ද්‍රයෙන් පොලිස්පතිට පැමිණිල්ලක්

හික්කඩුව - සීනිගම  දේවාලයේ මහ පෙරහර අතරතුර බෞද්ධ කොඩියට සමාන වර්ණයන්ගෙන් යුත් සාරිවලින් සැරසුණු තරුණියන් පිරිසක් ගමන් කිරීම සම්බන්ධයෙන් බෞද්ධ තොරතුරු කේන්ද්‍රය පොලිස්පතිවරයාට පැමිණිල්ලක් කර තිබෙනවා.

එමඟින් ඉල්ලා ඇත්තේ පෙරහර කමිටුවේ ප්‍රධානීන්ගෙන් මේ පිළිබඳව ප්‍රශ්න කර නිසි විමර්ශනයක් සිදුකරන ලෙසයි.

හික්කඩුව - සීනිගම දේවාලයේ දහවල් පෙරහර පසුගිය 26 සහ 27 වනදා පැවැත්වුණු අතර, එහි පළමු දිනයේ බෞද්ධ කොඩියේ වර්ණ නියෝජනය වන ආකාරයේ සාරිවලින් සැරසුණු තරුණියන් පිරිසක් පෙරහරට සම්බන්ධ කර තිබුණා.

අදාළ තරුණියන් එලෙස සාරිවලින් සැරසී පෙරහරට එක්ව සිටින ඡායාරූප සමාජජාල මාධ්‍ය ඔස්සේ ප්‍රචාරය වීමත් සමඟ 27 වනදා දහවල් පෙරහරේදී එම තරුණියන්ගේ සාරිය වෙනස් කිරීමට පියවර ගෙන තිබූ බවයි වාර්තාවන්නේ.

බෞද්ධ තොරතුරු කේන්ද්‍රය පොලිස්පතිවරයාට ලිපියක් යොමු කරමින් පෙන්වා දෙන්නේ පෙරහරෙහි අංගයක් ලෙස බෞද්ධ කොඩියක් විකෘති කර කාන්තා ඇඳුමක් සකස් කර තිබීමෙන් බෞද්ධ කොඩිය අවභාවිත කර ඇති බවයි.

ඒ පිළිබඳව විමර්ශනයක් සිදුකර වරදකරුවන් නීතිය හමුවට ගෙන එන ලෙස බෞද්ධ තොරතුරු කේන්ද්‍රයේ විධායක අධ්‍යක්‍ෂ පූජ්‍ය අඟුලුගල්ලේ සිරි ජිනානන්ද හිමියන් ඉල්ලීමක් කරනවා.