මහා සඟරුවන සමඟ පළමු ජාත්‍යන්තර ගුවන් යානය කුසිනාරාවට (ඡායාරූප)

කුසිනාරා හෙවත් කුෂිනගර් ගුවන් තොටුපොළ ජාත්‍යන්තර ගුවන් තොටුපොළක් බවට පත් කිරීම සංකේතවත් කරමින් පළමු ජාත්‍යන්තර ගුවන් යානය මහා සංඝරත්නය 95 නමක් සමඟ අද අලුයම පිටත්ව ගියා.

කුෂිනගර් ජාත්‍යන්තර ගුවන් තොටුපොළ අද නිල වශයෙන් විවෘත කෙරෙන්නේ ඉන්දීය අග්‍රාමාත්‍ය නරේන්ද්‍ර මෝදිගේ ප්‍රධානත්වයෙන්.

කටුනායක ගුවන් තොටුපොළ හිරු වාර්තාකරු සදහන් කළේ, අලුයම 5.30ට ශ්‍රී ලන්කන් ගුවන් සේවයට අයත් යූ.එල්. 1147 දරන ගුවන් යානය මෙලෙස භික්ෂූන් වහන්සේලා ඇතුළු මඟීන් 111 දෙනෙකු සමඟ දිවයිනෙන් පිටත්ව ගිය බවයි.

මෙම අවස්ථාවට අමාත්‍ය නාමල් රාජපක්ෂ, රාජ්‍ය අමාත්‍යවරුන් වන ඩී,වී. චානක සහ සිසිර ජයකොඩි ද එක්ව සිටියා.

කුෂිනගර් වෙත පළමු ගුවන් ගමන සිදු කෙරුණු අවස්ථාවේදී එහි සිටි පිරිසට සුබ පැතීම සදහා මෙරට ඉන්දීය මහකොමසාරිස් ගෝපාල් බාග්ලේ ද එක්වුණා.

සම්බුද්ධ පරිනිර්වාණය සිදු වූ කුසිනාරාවේ වන්දනා ගමන් වෙනුවෙන් ශ්‍රී ලංකාවට මෙම අවස්ථාව හිමිවන්නේ අග්‍රාමාත්‍ය මහින්ද රාජපක්ෂ සහ ඉන්දීය අග්‍රාමාත්‍යවරයා අතර පසුගිය වසරේ පැවති සාකච්ඡාවක ප්‍රතිඵලයක් ලෙසයි.

100 කට අධික මහා සංඝ රත්නය ඇතුළු ශ්‍රී ලංකා දූත පිරිස පිළිගැනීමද ඉන්දීය අග්‍රාමාත්‍යවරයා විසින් සිදු කිරීමට නියමිත බව එරට මාධ්‍ය වාර්තා කළා.

ශ්‍රී ලංකා දූත පිරිස වෙනුවෙන් විශේෂ වැඩසටහන් රැසක් කුසිනාරාවේ සංවිධාන කර ඇති බවයි ශ්‍රී ලංකාවේ ඉන්දීය මහ කොමසාරිස් කාර්යාලය ප්‍රකාශ කළේ.

මේ අතර මෙම සංචාරයට එක්වන අස්ගිරි පාර්ශවයේ අනුනායක වේඬරුවේ උපාලි අනුනාහිමියන් ප්‍රමුඛ ත්‍රෛනිකායික මහා සංඝරත්නය ඊයේ අග්‍රාමාත්‍ය මහින්ද රාජපක්ෂ මුණගැසුණා.

මුහුදු මට්ටමින් අඩි 261ක උසකින් පිහිටා ඇති කුෂිනගර් ජාත්‍යන්තර ගුවන් තොටුපොළ එක් ධාවන පථයකින් යුක්ත වන අතර, බෝයිං 737 වර්ගයේ ගුවන් යානාද ගොඩබැස්විය හැකි අයුරින් නිර්මාණය කර තිබෙනවා.

එය ඉන්දියාවේ 29 වන ජාත්‍යන්තර ගුවන් තොටුපොළයි.

මෙය විවෘත කිරීමත් සමඟ බෞද්ධ බැතිමතුන්ට නවදිල්ලිය හරහා නොගොස් ඍජුවම කුසිනාරාව වෙත ළඟාවීමට ඉඩ සැළසෙනවා.