වැලිසර අනතුරේ පිය - පුතු දෙපළ අත්අඩංගුවට (වීඩියෝ)

පුද්ගලයෙකුට මරු කැඳවමින් තවත් සිව් දෙනෙකුට තුවාල සිදුකරමින් වැලිසර මහබාගේ ප්‍රදේශයේ අද පෙරවරුවේ සිදුවූ රිය අනතුරට අදාළව එම රථය පැදවූ 16 හැවිරිදි සිසුවා සහ ඔහුගේ පියා පොලීසිය අත්අඩංගුවට ගෙන තිබෙනවා.

මෙම සිසුවා පැදවූ සුඛෝපභෝගී රථය මාර්ගයෙන් ඉවතට පැන අනෙක් මංතීරුවේ පැමිණි මෝටර් රථයක ගැටී අනතුරට ලක්වූ අතර, ත්‍රිරෝද රථයක් සහ යතුරුපැදි දෙකක් ද ඊට මැදිවුණා.

අනතුරෙන් මියගියේ එක් යතුරුපැදියක ගමන් කළ මහබාගේ ප්‍රදේශයේ පදිංචි 52 හැවිරිදි අයෙක්.

16 හැවිරිදි සිසුවා පැදවූ සුපිරි ජීප් රථයක් තවත් වාහන කිහිපයක ගැටී අනතුරට පත්වීම හේතුවෙන් පුද්ගලයෙකු ජීවිතක්ෂයට පත්වූ තවත් සිව්දෙනෙකු අද පෙරවරුවේ තුවාල ලැබුවා.

එම අනතුර වාර්තා වුණේ කොළඹ - මීගමුව ප්‍රධාන මාර්ගයේදියි.

ජීප් රථයේ අධික වේගය හේතුවෙන් එය පාලනය කර ගැනීමට නොහැකිව මාර්ගයේ අනෙක් මංතීරුව වෙත කඩා වැදී තිබුණා.

අද පෙරවරු 9.30ට පමණ මෙම අනතුර සිදුව තිබුණේ කොළඹ - මීගමුව ප්‍රධාන මාර්ගයේ වැලිසර පොදු සුසාන භූමිය ආසන්නයේදීයි.

කොළඹ දෙස සිට මීගමුව දෙසට ධාවනය වූ සුඛෝපභෝගී ජීප් රථයක් වේගය පාලනය කරගත නොහැකිව ප්‍රතිවිරුද්ධ දෙසින් ධාවනය වූ යතුරුපැදියක සහ මෝටර් රථයක ගැටී මෙම අනතුර සිදුවී තිබුණා.

අනතුරින් බරපතල තුවාල ලැබූ පස්දෙනෙකු රාගම ශික්ෂණ රෝහලට ඇතුළත් කෙරුණු අතරල එහිදී බරපතළ තුවාල ලබා සිටි යතුරුපැදිකරු ජීවිතක්ෂයට පත්ව තිබෙනවා.

ඔහු සමඟ යතුරුපැදියේ ගමන් ගත් පසුපැදිකරුගේ තත්ත්වය බරපතළ වීම හේතුවෙන් ඔහු කොළඹ ජාතික රෝහලට මාරු කර යැවුණා.

අනතුරට ලක්වූ සුඛෝපභෝගී ජීප් රථය ධාවනය කර තිබුණේ 16 හැවිරිදි සිසුවෙක්.

ඔහු මහබාගේ ප්‍රදේශයේම ස්වර්ණාභරණ වෙළෙඳසැල් හිමිකරුවෙකුගේ පුත්‍රයෙක්.

ජීප් රථය ධාවනය කළ දරුවාගේ පියා ද පසුව එම ස්ථානයට පැමිණි අතරල ඔහුට ද රැස්ව සිටි පුද්ගලයින් විරෝධය පළ කළා.

අනතුරට පත් ජීප් රථය ධාවනය කළ 16 හැවිරිදි දරුවා සහ ජීප් රථයේ හිමිකරු වන එම සිසුවාගේ පියා මහබාගේ පොලිසිය අත්අඩංගුවට ගෙන ඇති අතර ඔවුන් හෙට දිනයේ වත්තල මහේස්ත්‍රාත් අධිකරණයට ඉදිරිපත් කිරීමට නියමිතයි.