කොහුවල ගුවන් පාලමේ ඉදිකිරීම් හේතුවෙන් විකල්ප මාර්ග භාවිත කරන්නැයි ඉල්ලීමක්

කොහුවල ගුවන් පාලමේ ඉදිකිරීම් කටයුතු හේතුවෙන් සිදුවිය හැකි මාර්ග තදබදය අවම කරගැනීම සඳහා විකල්ප මාර්ග භාවිත කරන ලෙස පොලිසිය රියදුරන්ගෙන් සහ මහජනතාවගෙන් ඉල්ලීමක් කරනවා.

පසුගිය 22 වනදා නැවත ආරම්භ කළ මෙම ගුවන් පාලමේ ඉදිකිරීම් කටයුතු මැයි මස 31 වනදා දක්වා සිදු කෙරෙන බවයි මාර්ග සංවර්ධන අධිකාරිය සඳහන් කළේ.

අදාළ කාලය තුළ කොහුවල මංසන්ධිය හරහා මගී බස්රථ හා සැහැල්ලු වාහන සඳහා ගමන් කිරීමට හැකියාව පවතිනවා.

මාර්ග සංවර්ධන අධිකාරිය විසින් ජනතාව දැනුවත් කිරීම සඳහා විකල්ප මාර්ග සඳහන් දැනුවත් කිරීමේ පුවරු, ගාලු පාර - විලියම් මංසන්ධිය, නුගේගොඩ, කිරුළපන, බොරලැස්ගමුව, ගම්සභා හන්දිය, පැපිළියාන, පාමංකඩ යන මංසන්ධිවල මෙන්ම කහතුඩුව අධිවේගී මාර්ග පිවිසුමේ ද සවිකර තිබෙනවා.