කලින් ලාභයි, දැන් අලාභයි: සීනි කඩේ ආර්ථික දායකත්වය රු බිලියන 11ක් - නි. ඇමති චතුරංග

ශ්‍රී ලංකාවේ සීනි කර්මාන්තයේ වත්මන් මූල්‍ය දත්ත පදනම් කරගනිමින් "කලින් ලාභයි, දැන් අලාභයි" යනුවෙන් සමාජය තුළ සිදුවන සරල නිගමනවල පවතින සැබෑ යථාර්ථය පැහැදිලි කරමින් කර්මාන්ත හා ව්‍යවසායකත්ව සංවර්ධන නියෝජ්‍ය අමාත්‍ය චතුරංග අබේසිංහ දීර්ඝ විග්‍රහයක් සිය සමාජ මාධ්‍ය ගිණුම තුළින් ඉදිරිපත් කර තිබෙනවා.

ඇතැම් රාජ්‍ය ව්‍යාපාරවල වටිනාකම හුදු ලාභ අලාභ පත්‍රයකින් පමණක් මැනිය නොහැකි බව පෙන්වා දෙන නියෝජ්‍ය අමාත්‍යවරයා, මෙම කර්මාන්තය හරහා වාර්ෂිකව අවම වශයෙන් රුපියල් බිලියන 11ක සෘජු ආර්ථික අගයක් ජාතික සහ ග්‍රාමීය ආර්ථිකයට එකතු වන බව පවසනවා.

දැනට පවතින වෙළෙඳපොළ ඒකාධිකාරයට සහ අතරමැදියන්ගේ සූරාකෑමට පිළියමක් ලෙස සීනි සමාගම සෘජු සිල්ලර වෙළෙඳාමට (Retail Business) පිවිසීමට සැලසුම් කර ඇති බවත් දැනට තොග වෙළෙන්දන් රුපියල් 205කට ලබාගන්නා සීනි පැකට් කර පාරිභෝගිකයා අතට පත් කරන්නේ රුපියල් 270-320ත් අතර ඉහළ මිලකට බවත් නි. අමාත්‍යවරයාගේ සටහනේ සඳහන්.

මේ සඳහා විසඳුමක් ලෙස 'නුගේගොඩ සීනි කඩේ' කොළඹ ප්‍රධාන මෙහෙයුම් කේන්ද්‍රස්ථානය (Colombo Hub) ලෙස සංවර්ධනය කරන බවත් ඉදිරියේදී නුගේගොඩින් බෙදාහරින මෙම දේශීය දුඹුරු සීනි, සමපෝෂ, මිල්කෝ (Milco) සහ NLDB වැනි රාජ්‍ය අලෙවිසැල් ජාල හරහා පාරිභෝගිකයාට සෘජුවම ලබාගත හැකි බවත් සටහන් කර තිබෙනවා.

එමෙන්ම, නවීන පාරිභෝගික අවශ්‍යතා සපුරාලමින් ක්‍රියාත්මක වන ඔන්ලයින් වෙළෙඳ වේදිකාවල (Online Platforms) භාණ්ඩ ලබාගැනීමේ මධ්‍යස්ථානය (Pickup Point) ලෙස ද මෙම නුගේගොඩ සීනි කඩේ පරිශ්‍රය ඉදිරියේදී භාවිතයට ගැනීමට කටයුතු සූදානම් කර ඇති බවත් නි. අමාත්‍යවරයාගේ සටහනේ වැඩිදුරටත් සඳහන්.