දිස්ත්‍රික්ක කිහිපයකට වැසි: පළාත් කිහිපයකට තරමක තද සුළං

බස්නාහිර, සබරගමුව සහ වයඹ පළාත්වලට අද (21) දිනයේ වැසි වාර කිහිපයක් ඇති විය හැකි බව කාලගුණ විද්‍යා දෙපාර්තමේන්තුව නිවේදනය කරනවා.

ඊට අමතරව, ගාල්ල, මාතර, මහනුවර සහ නුවරඑළිය යන දිස්ත්‍රික්ක සඳහා ද වැසි වාර කිහිපයක් අපේක්ෂා කළ හැකි බවයි ඔවුන් නිකුත් කළ නවතම කාලගුණ නිවේදනයේ සඳහන්.

තවද, ඌව සහ නැගෙනහිර පළාත්වල තැනින් තැන පස්වරු 2.00 න් පසුව වැසි හෝ ගිගුරුම් සහිත වැසි ඇති වීමේ හැකියාවක් පවතින බවයි එම දෙපාර්තමේන්තුව පවසන්නේ.

වැසි තත්ත්වයට අමතරව, දිවයිනේ ප්‍රදේශ කිහිපයකට විටින් විට හමන පැයට කිලෝමීටර් 30 ත් 40 ත් අතර තරමක තද සුළං ඇති විය හැකි බවට නිවේදනය කරන කාලගුණ විද්‍යා දෙපාර්තමේන්තුව, මධ්‍යම කඳුකරයේ බටහිර බෑවුම් ප්‍රදේශ, උතුරු පළාත, උතුරු-මැද පළාත, වයඹ පළාත, දකුණු පළාත සහ ත්‍රිකුණාමලය දිස්ත්‍රික්කය සඳහා මෙම තද සුළං තත්ත්වය බලපෑ හැකි බවයි සඳහන් කරන්නේ.